ශ්රී ලංකා නීතිඥ සංගමයේ (BASL) 2027/28 වර්ෂය සඳහා වන සභාපති ධුරයට තරග කිරීමට තමන් තීරණය කර ඇති බව ජනාධිපති නීතිඥ කුවේර ද සොයිසා නිල වශයෙන් නිවේදනය කර තිබේ. නීතිඥ සංගමයේ හිටපු සභාපතිවරුන් ඇතුළු නීති ක්ෂේත්රයේ ප්රවීනයන් රැසක් විසින් ඔහු වෙත යොමු කළ ලිඛිත ආරාධනාවකින් අනතුරුව ඒ මහතා මෙම තීරණයට එළඹ ඇත.
ශක්තිමත් නායකත්වයක් සඳහා වූ ඉල්ලීම වර්තමානයේ නීති ක්ෂේත්රය හමුවේ ඇති සංකීර්ණ තත්ත්වයන් මධ්යයේ ශක්තිමත් නායකත්වයක අවශ්යතාව අවධාරණය කරමින් ජ්යෙෂ්ඨ නීතිඥවරුන් සිය ලිපිය මගින් මෙසේ ප්රකාශ කර ඇත:
“වර්තමානයේදී නීති වෘත්තිකයන්හට මුහුණ දීමට සිදුව ඇති සංකීර්ණ අභියෝග හමුවේ නීතිඥ සංගමයේ සියලු සාමාජිකයන් එක්සත් කිරීම සඳහා ශක්තිමත් සහ පළපුරුදු නායකත්වයක් අවශ්ය බව නීතිඥ ප්රජාවේ බහුතර මතය වී තිබේ.”
කුවේර ද සොයිසා ගේ අපේක්ෂකත්වය සඳහා කොළඹ මෙන්ම පිට පළාත් නීතිඥ සංගම් නියෝජනය කරන ප්රවීනයන් රැසකගේ සහයෝගය හිමිව ඇත. ඒ අතරට ශ්රී ලංකා නීතිඥ සංගමයේ හිටපු සභාපතිවරුන් වන ජනාධිපති නීතිඥවරුන් වන ආචාර්ය රොමේෂ් ද සිල්වා, ඉක්රාම් මොහොමඩ්, ඩබ්ලිව්. දයාරත්න, ජෙෆ්රි අලගරත්නම්, ආචාර්ය විජයදාස රාජපක්ෂ, කාලිංග ඉන්දතිස්ස, යූ. ආර්. ද සිල්වා සහ සාලිය පීරිස් යන මහත්වරු ද, ජ්යෙෂ්ඨ ජනාධිපති නීතිඥවරුන් වන ආචාර්ය කේ. කනගීශ්වරන් සහ ආචාර්ය ෆයිස් මුස්තාපා යන මහත්වරු ද ඇතුළත් වෙති.
වෘත්තීය පසුබිම සහ දායකත්වය වාණිජ නීතිය සහ සිවිල් නීතිය යන ක්ෂේත්රයන්හි දශක තුනකට අධික පළපුරුද්දක් සහිත ප්රමුඛ පෙළේ නීතිඥවරයෙකු වන කුවේර ද සොයිසා, නීතිඥ ප්රජාවේ අභිවෘද්ධිය වෙනුවෙන් සුවිශේෂී කාර්යභාරයක් ඉටු කර ඇත:
- වෘත්තීය නායකත්වය: 2014 සහ 2015 වසරවලදී ජාතික නීති සම්මේලනයේ සභාපති ලෙස කටයුතු කිරීම.
- තරුණ නීතිඥයන් සවිබල ගැන්වීම: කනිෂ්ඨ නීතිඥවරුන් 8,000කට අධික ප්රමාණයක් නියෝජනය කළ කනිෂ්ඨ නීතිඥ කමිටුවේ සභාපති ලෙස කටයුතු කිරීම (2018 සහ 2019).
- සුබසාධනය සහ ප්රජා සත්කාර: 2017 වසරේදී නීතිඥ සංගමයේ සමාජ හා සුබසාධන කමිටුවේ සහ ජාතික නීති සතියෙහි සභාපති ධුරය හෙබවීම.
- අඛණ්ඩ අධ්යාපන සහ පුහුණු වැඩසටහන් (CLE): සිවිල් නඩු විධානය, බුද්ධිමය දේපල නීතිය, වාණිජ සමථකරණය, බේරුම්කරණය සහ සමාගම් නීතිය යන විෂයයන් සඳහා නීතිඥ සංගමයේ සම්පත්දායකයෙකු ලෙස අඛණ්ඩව දායක වීම.