කොළඹ | ‘හරිදේශය’ පුවත් සේවය
කාන්තාවන්ට ලිංගික හිංසනය සහ අතවර කළ බවට බරපතල චෝදනා එල්ල වී ඇති Prestige Rubbers (Pvt) Ltd ආයතනයේ සභාපති ශස්නි කමාඩීන් (Shazni Kamardeen) අත්අඩංගුවට ගැනීම සඳහා පොලිසිය විශේෂ මෙහෙයුමක් ආරම්භ කර තිබේ. පොලිස් කණ්ඩායම් සැකකරුගේ නිවස වටලන අවස්ථාව වන විට ඔහු නිවසින් පලාගොස් ඇති බව වාර්තා වේ.
අධිකරණ තෝල්කවරයා ගැන සැකයක්?
සැකකරු පලායාමට මොහොතකට පෙර, අධිකරණයේ සේවය කරන තෝල්ක මුදලිවරයෙකු ඔහුගේ නිවසේ රැඳී සිට ඇති බවට තොරතුරු අනාවරණය වී ඇති අතර පොලිසිය නිවසට යන විටත් ඔහු එහි රැඳී සිට ඇතැයි පැවසේ. සැකකරුට පැන යාමට මොහු උදව් කළේ ද යන්න පිළිබඳව පොලිසියේ දැඩි අවධානය යොමුව ඇති අතර, අදාළ තෝල්කවරයාගෙන් පොලිසිය මේ වන විටත් ප්රකාශයක් සටහන් කරගෙන තිබේ.
එල්ල වී ඇති බරපතල චෝදනා:
- කාන්තා හිංසනය: සේවයට පැමිණි කාන්තාවන් බලහත්කාරයෙන් නිරුවත් කර වධහිංසා පැමිණවීම සහ වසර ගණනාවක් තිස්සේ සේවිකාවන්ට සිදුකළ ලිංගික හිරිහැර.
- මනුෂ්ය ජාවාරම: ‘Silverline Manpower’ ආයතනයේ හිමිකාරිනිය වන ශානිකා නමැත්තිය හරහා “උපස්ථායක” රැකියා මුවාවෙන් කාන්තාවන් මොහු වෙත යොමු කිරීමේ ජාලයක් පවත්වාගෙන යාම.
- ඝාතන සැකය: මත්පැන් පානය කර සිටි අවස්ථාවක, තමා විසින්ම තම පියා ඝාතනය කළ බවට සැකකරු සිදුකළ ප්රකාශයක් සම්බන්ධයෙන් ද විමර්ශන ආරම්භ කර ඇත.
පොලිස් ක්රියාමාර්ග සහ ඉදිරි පියවර
නියෝජ්ය පොලිස්පති දර්ශිකා කුමාරි ගේ සෘජු අධීක්ෂණය යටතේ මෙම විමර්ශන ක්රියාත්මක වේ. සැකකරු නීති විරෝධී ලෙස රටින් පලායාමට උත්සාහ කළ හැකි බැවින්, පොලිස්පතිවරයාගේ නියමයෙන් වහාම ක්රියාත්මක වන පරිදි ගුවන්තොටුපළ බලධාරීන් දැනුවත් කර තිබේ.
මේ අතර, පොලිස් අත්අඩංගුවට ගැනීම මගහැර සිටින සැකකාර ශස්නි කමාඩීන්, නීතිඥයෙකු මාර්ගයෙන් අධිකරණයට ඉදිරිපත් වීමට සූදානමක් ඇති බව ද අභ්යන්තර ආරංචි මාර්ග පවසයි.
ප්රෙස්ටීජ් රබර්ස් ආයතනය තුළ සිදුවී ඇතැයි කියන තවත් වංචා සහ අපරාධ රැසක් ඉදිරියේදී හෙළිවීමට නියමිත බව පොලිසිය වැඩිදුරටත් සඳහන් කරයි.