(කොළඹ, පාකිස්ථාන මහකොමසාරිස් කාර්යාලය) –
මෑතකදී ශ්රී ලංකාවට බලපෑ “දිත්වා” (DITWAH) සුළි කුණාටුව හේතුවෙන් සිදුවූ ජීවිත හා දේපළ හානි සම්බන්ධයෙන් පාකිස්ථාන රජයේ සහ ජනතාවගේ බලවත් ශෝකය පළ කිරීම සඳහා පාකිස්ථාන සමුද්රීය කටයුතු පිළිබඳ ෆෙඩරල් අමාත්ය මුහම්මද් ජුනයිඩ් අන්වර් (Muhammad Junaid Anwar) මහතා දෙදින නිල සංචාරයක් සඳහා දිවයිනට පැමිණ සිටී.
අද (09) පෙරවරුවේ කොළඹ පිහිටි පාකිස්ථාන මහකොමසාරිස් කාර්යාලයේදී පැවති විශේෂ මාධ්ය හමුවකදී අමාත්යවරයා අවධාරණය කළේ, මෙම දුෂ්කර අවස්ථාවේදී පාකිස්ථානය පූර්ණ සහෝදරත්වයෙන් යුතුව ශ්රී ලංකාව සමඟ සිටින බවයි.
අගමැති ෂෙහ්බාස් ෂරීෆ්ගෙන් විශේෂ පණිවිඩයක් සහ සහන මලු පාකිස්ථාන අග්රාමාත්ය මුහම්මද් ෂෙහ්බාස් ෂරීෆ් මහතාගේ විශේෂ උපදෙස් පරිදි, විපතට පත් ජනතාව වෙනුවෙන් ප්රධාන පෙළේ මානුෂීය ආධාර තොගයක් මේ වන විටත් ශ්රී ලංකාව වෙත එවා ඇති බව අමාත්යවරයා සඳහන් කළේය. එමෙන්ම, පාකිස්ථාන මුදාගැනීමේ කණ්ඩායම් සහ සහන සේවකයින් මේ වන විටත් දිවයිනට පැමිණ ජීවිත ආරක්ෂා කර ගැනීමේ සහ සහන සැපයීමේ මෙහෙයුම්වල නිරතව සිටින බව ද ඔහු තහවුරු කළේය.
රාජ්යතාන්ත්රික මට්ටමේ සම්බන්ධීකරණය මෙරටට ලැබී ඇති සහන ද්රව්ය විපතට පත් ජනතාව වෙත කඩිනමින් සහ විධිමත්ව බෙදා හැරීම සහතික කිරීම සඳහා කොළඹ සිටින පාකිස්ථාන මහකොමසාරිස් මේජර් ජෙනරාල් ෆාහිම් උල් අසීස් (Faheem ul Aziz) මහතා සහ පාකිස්ථාන ජාතික ආපදා කළමනාකරණ අධිකාරිය, ශ්රී ලංකාවේ අදාළ බලධාරීන් සමඟ ඉතා සමීපව කටයුතු කරමින් සිටින බව අමාත්ය අන්වර් මහතා පැවසීය.
දේශගුණික අභියෝග සහ කලාපීය සහයෝගීතාව ශ්රී ලංකා රජය ආපදා අවස්ථාවේදී ගනු ලැබූ කඩිනම් ක්රියාමාර්ග සහ විපතට පත් ජනතාව පෙන්නුම් කළ ධෛර්යය අමාත්යවරයාගේ ඇගයීමට ලක්විය. මෑතකදී පාකිස්ථානය ද දරුණු ගංවතුර තත්ත්වයකට මුහුණ දුන් බව සිහිපත් කළ අමාත්යවරයා, දිනෙන් දින ඉහළ යන දේශගුණික විපර්යාස සම්බන්ධ අභියෝග ජය ගැනීම සඳහා කලාපීය රටවල් වඩාත් සමීපව කටයුතු කළ යුතු බව අවධාරණය කළේය.
අනාගතයේදී ආපදා කළමනාකරණය, සමුද්රීය ආරක්ෂාව සහ පූර්ව අනතුරු ඇඟවීමේ පද්ධති සම්බන්ධයෙන් දෙරට අතර සහයෝගීතාව තවදුරටත් ශක්තිමත් කිරීමට පාකිස්ථානය බලාපොරොත්තු වන බව ද හෙතෙම සඳහන් කළේය.
“විශ්වාසවන්ත මිතුරෙකු සහ හවුල්කරුවෙකු ලෙස අදත්, කවදත් පාකිස්ථානය ඔබ සමඟ සිටින බවට ශ්රී ලාංකික ජනතාවට සහතික වීමට මට අවශ්යයි,” යනුවෙන් අමාත්යවරයා සිය කතාව අවසන් කරමින් පැවසීය.