“ආණ්ඩුව හදන්නේ ජනතාවට කට අරින්න වෙන්නේ කන්නයි ඈනුම් අරින්නයි විතරක් වෙන රටක් හදන්න” — ජන අරගල ව්යාපාරයෙන් ආණ්ඩුවේ මර්දන උපායමාර්ගයට දැඩි ප්රහාරයක්
(විශේෂ දේශපාලන වාර්තාකරු – HariDeshayaLk)
2022 වසරේදී මෙරට ආර්ථිකය වනසා ජනතා ධනය මංකොල්ල කෑ දූෂිත පාලක පන්තියට එරෙහිව ගොඩනැගුණු ඓතිහාසික ජනතා අරගලයේ උණුසුම් අළු මතින්, “සාධාරණත්වයක් සහ සමාජ පරිවර්තනයක්” පොරොන්දු වෙමින් බලයට පත් වූ ජාතික ජන බලවේග (NPP) ආණ්ඩුව, අද තමන්ට ඡන්දය දුන් පොදු මහජනතාවගේම මුව වසා දමන නින්දිත මර්දන යාන්ත්රණයක සුක්කානම අතට ගෙන තිබේ.
ත්රස්තවාදය වැළැක්වීමේ තාවකාලික විධිවිධාන පනත (PTA), අලුතින් ගෙන ඒමට සැලසුම් කර ඇති ත්රස්තවාදයෙන් රාජ්ය ආරක්ෂා කිරීමේ පනත (PSTA) සහ සංවිධානාත්මක අපරාධ වැළැක්වීමේ පනත (OCA) යන අතිශය මර්දනකාරී කෙටුම්පත් ත්රිත්වය වහා අහෝසි කරන ලෙස බලකරමින් හෙට, නොවැම්බර් 04 වන දින දහවල් 12.00ට පාර්ලිමේන්තු වටරවුම අසල දැවැන්ත මහජන විරෝධතාවක් දියත් කරන බව ජන අරගල ව්යාපාරය නිල වශයෙන් නිවේදනය කළේය.

නුගේගොඩදී අද (නොවැම්බර් 03) පස්වරුවේ කැඳවා තිබූ විශේෂ මාධ්ය හමුවක් අමතමින් ජන අරගල ව්යාපාරයේ ජාතික විධායක සභික වසන්ත මුදලිගේ ආණ්ඩුවේ මර්දනකාරී ප්රතිපත්තිය දැඩි විවේචනයට ලක් කරමින් මේ බව අනාවරණය කළේය.
තුනෙන් දෙකේ පාර්ලිමේන්තු බලය සහ හදිසි පසුබැසීම
වත්මන් ආණ්ඩුව සතු තුනෙන් දෙකක බහුතර පාර්ලිමේන්තු බලය අවභාවිත කරමින් නොවැම්බර් 04 සහ 05 යන දින දෙක තුළ PSTA පනත පාර්ලිමේන්තුවට ඉදිරිපත් කර කඩිනමින් සම්මත කරගැනීමට සැලසුම් කර තිබූ බව වසන්ත මුදලිගේ මෙහිදී පෙන්වා දුන්නේය. එහෙත් ඊට එරෙහිව රට තුළ ගොඩනැගුණු ප්රබල සමාජ හා දේශපාලන විරෝධය හේතුවෙන් ආණ්ඩුවට එම තීරණය තාවකාලිකව අත්හිටුවීමට සිදුවී තිබේ.
“ආණ්ඩුව තුනෙන් දෙකේ බලය දාලා හෙට අනිද්දා මේ පනත පාස් කරගන්න හැදුවේ. ඒකට එල්ල වුණු දැවැන්ත විරෝධය නිසා ආණ්ඩුව තාවකාලිකව පස්සට ගියා. ජනතා මතයට යම් තරමකින් හරි කන්දීපු එක හොඳයි. හැබැයි අපේ සටන මෙතැනින් ඉවර නැහැ. අපි ආණ්ඩුවට පැහැදිලිව කියන්නේ PSTA විතරක් නෙවෙයි, දශක ගණනාවක් මේ රටේ ලේ හලපු PTA එකත්, අලුතින් ගේන OCA පනතත් මුළුමනින්ම හකුළාගත යුතුයි!” යැයි මුදලිගේ අවධාරණය කළේය.
IMF කොන්දේසි, බදු බර සහ ගජමිතුරු රැකවරණය
රට තුළ පවතින ආර්ථික අර්බුදය හමුවේ ආණ්ඩුව ක්රියාත්මක කරමින් සිටින IMF කොන්දේසි මූලික කරගත් ආර්ථික ප්රතිපත්තිය නිසා සමාජයේ සියලු ස්ථර දැඩි පීඩනයකට ලක්ව ඇති බව ජන අරගල ව්යාපාරය පෙන්වා දෙයි:
- ජනතාව මත පැටවූ බදු බර: තරුණයන්ට සිය යතුරුපැදියට හෝ ත්රිරෝද රථයට ඉන්ධන ටික ලබාගැනීමට නොහැකි වී ඇත; රෝහල් පද්ධතිය තුළ අත්යවශ්ය ඖෂධ හිඟය උග්ර වී තිබේ; පාසල් දරුවන්ගේ පොත්පත් සහ කාන්තාවන්ගේ සනීපාරක්ෂක ද්රව්ය මත පවා අධික බදු පනවා ඇත.
- ගජමිතුරන්ට සැලකිලි: සාමාන්ය ජනතාව අධික බදු බරින් මිරිකෙද්දී, ඩඩ්ලි සිරිසේනලා ඇතුළු මහා පරිමාණ ගජමිතුරු ව්යාපාරික කල්ලිවලට ආණ්ඩුව සියලු වරප්රසාද සහ සහන අඛණ්ඩව ලබා දෙමින් සිටියි.
මෙම අසාධාරණයට එරෙහිව ජනතාව යළිත් වීදි බැසීම නොවැළැක්විය හැකි තත්ත්වයක් බවත්, 2022 වැනි තවත් ජනතා නැගිටීමක් පාලනය කිරීමේ අරමුණින් ආණ්ඩුව මෙවැනි මර්දන පනත් සම්පාදනය කරමින් සිටින බවත් මුදලිගේ චෝදනා කළේය.
“මේ පනත් සම්මත වුණොත් මේ රටේ ජනතාවට කට අරින්න වෙන්නේ කන්නයි ඈනුම් අරින්නයි විතරයි. ආණ්ඩුවේ මංකොල්ලකෑම්වලට විරුද්ධව හඬක් නගන්න කාටවත් ඉඩක් ඉතිරි වෙන්නේ නැහැ.”
පොලිස් අපරාධවලට නීතිමය ආවරණයක්?
මෑත කාලයේ සිදුවූ හෝමාගම පොලිස් සිරමැදිරිය තුළ තරුණයෙකු අමානුෂික ලෙස ඝාතනය වීම සහ කඩවතදී ත්රිරෝද රථයකට පොලීසිය විසින් වෙඩි තැබීම වැනි සිදුවීම් හමුවේ ආණ්ඩුව පූර්ණ නිහඬතාවක් අනුගමනය කළ බව මාධ්ය හමුවේදී සිහිපත් කෙරිණි. එලෙස සාහසික ලෙස හැසිරෙන පොලිස් යාන්ත්රණයට මෙම නව පනත් හරහා තවදුරටත් අසීමිත බලතල පවරා දීමට ආණ්ඩුව සැරසෙන බව ඔවුහු පෙන්වා දෙති:
- රඳවා ගැනීමේ කාලය පැය 72ක් දක්වා දීර්ඝ කිරීම: සාමාන්ය නීතිය යටතේ පවතින පැය 24ක කාලසීමාව පැය 72ක් දක්වා දීර්ඝ කර, අත්අඩංගුවට ගන්නා පුද්ගලයින් රඳවා තබාගෙන වධහිංසා පැමිණවීමට නීතිමය ඉඩකඩ පුළුල් කිරීම.
- වධහිංසා මඟින් ලබාගන්නා පාපොච්ඡාරණ සාක්ෂි ලෙස පිළිගැනීම: පොලිස් පහරදීම් සහ බියවැද්දීම් හමුවේ බලහත්කාරයෙන් ලබාගන්නා පාපොච්ඡාරණ (Confessions) අධිකරණය ඉදිරියේ නීත්යානුකූල සාක්ෂියක් බවට පත්කිරීමට ඉඩ සැලසීම.
අතීත මර්දනය අමතක කළ ජවිපෙ නායකත්වයේ ඛේදවාචකය
අතීතයේදී PTA පනත යටතේ දරුණු මර්දනයකට මුහුණ දුන්, පොලිස් අත්අඩංගුවේදී නායකයින් ඝාතනයට ලක්වූ සහ බලහත්කාර පාපොච්ඡාරණ මත වසර ගණනාවක් සිරගතව සිටි සාමාජිකයින් තවමත් ජීවත්ව සිටින ජනතා විමුක්ති පෙරමුණ ප්රමුඛ දේශපාලන බලවේගයක් අද ආණ්ඩු බලයේ හිඳිමින් එවැනිම මර්දන නීති සම්මත කිරීමට සැරසීම බරපතළ ඓතිහාසික ඛේදවාචකයක් බව වසන්ත මුදලිගේ සඳහන් කළේය.
“එදා කම්කරු අයිතිවාසිකම්, නිදහස් අධ්යාපනය සහ ප්රජාතන්ත්රවාදය වෙනුවෙන් වේදිකා දෙදරවමින් කතා කළ අය, අද බලයට ඇවිත් රටේ පොදු ජනතාව ත්රස්තවාදීන් කරන නීති ගේනවා. බලය හමුවේ ඔවුන්ට ඒ අතීතය මුළුමනින්ම අමතක වෙලා,” යැයි ඔහු පැවසීය.



