ශ්‍රී ලංකාවේ දේපළ වෙළඳාම් ක්ෂේත්‍රය (Real Estate) හුදෙක් දේශීය වෙළඳපොළකට පමණක් සීමා නොවී, රටට ඩොලර් ගලා එන ප්‍රධානතම ආදායම් මාර්ගයක් බවට පත් කළ හැකි බව ප්‍රයිම් ගෲප් (Prime Group) නිර්මාතෘ සහ සභාපති ප්‍රේමලාල් බ්‍රහ්මණගේ මහතා අවධාරණය කරයි.
වසර 30ක විශ්වාසනීයත්වයක් දිනූ ප්‍රයිම් සමූහයේ ඉදිරි ගමන, කොළඹ වරාය නගරයේ (Port City) ඉදිවන දැවැන්ත ‘ප්‍රයිම් මරීනා’ (Prime Marina) ව්‍යාපෘතිය සහ දේපළ ආයෝජනයේ සැබෑ ලාභය පිළිබඳව කිෂානි අලංකි සමඟ පැවති ‘Conversations with Alanki’ වැඩසටහනට එක්වෙමින් ඒ මහතා සිය අදහස් මෙසේ බෙදාගත්තේය.
වසර 30ක දැවැන්තයෙක් ‘Startup’ එකක් සේ වැඩ කිරීමේ රහස
දශක තුනක කාලයක් තුළ මෙරට මුහුණ දුන් කොවිඩ් වසංගතය, මූල්‍ය අර්බුද සහ විදේශ විනිමය හිඟය හමුවේ වුවද ප්‍රයිම් ගෲප් ලැබූ සාර්ථකත්වයේ රහස නම්‍යශීලීත්වය හා නවෝත්පාදනය බව ප්‍රේමලාල් බ්‍රහ්මණගේ මහතා පෙන්වා දෙයි.
“අපේ ආයතනය නිරීක්ෂණය කළ ඉන්දීය උපදේශක කණ්ඩායමක් පැවසුවේ, අප වසර 30ක් පැරණි සාම්ප්‍රදායික සමාගමක් නොව අලුතින් ඇරඹූ ක්‍රියාශීලී Startup එකක් මෙන් තවමත් වැඩ කරන බවයි. 1% ගෙවීමේ ක්‍රම සහ 5% මූලික ගෙවීමේ පහසුකම් මෙරටට මුලින්ම හඳුන්වා දෙමින් අපි දේපළ ක්ෂේත්‍රය තුළ මූල්‍ය විප්ලවයක් කළා. පසුව බැංකු පවා ඒ මඟ ගියා.”
Port City හි වාස්තු විද්‍යා ආශ්චර්යය: “Prime Marina”
කොළඹ වරාය නගරයේ උපායමාර්ගිකව ඉහළම වටිනාකමක් සහිත ස්ථානයක, මෙල්වා සමූහය (Melwa Group) සමඟ එක්ව ක්‍රියාත්මක කරන ‘ප්‍රයිම් මරීනා’ ව්‍යාපෘතිය සමස්ත ආසියාවේම සුවිශේෂී ව්‍යාපෘතියක් වනු ඇති බව ඔහු පවසයි.
- ජාත්‍යන්තර සැලසුම් ශිල්පීන්: ව්‍යාපෘතිය සැලසුම් කර ඇත්තේ හොංකොං, සිංගප්පූරුව ආදී රටවල දැවැන්ත නිර්මාණ බිහිකළ වසර 160ක් පැරණි සිංගප්පූරු P&T ආයතනය විසිනි.
- ලෝක මට්ටමේ භූමි අලංකරණය: සිංගප්පූරුවේ සුප්‍රසිද්ධ ‘Garden by the Bay’ නිර්මාණය කළ බ්‍රිතාන්‍යයේ Grant Associates සමාගම මෙහි භූමි අලංකරණ කටයුතු භාරව සිටියි.
- ශ්‍රී ලංකාවේ ප්‍රථම වරට සුඛෝපභෝගී Yacht අත්දැකීමක්: ව්‍යාපෘතියේ පාරිභෝගිකයින් වෙනුවෙන්ම ඕස්ට්‍රේලියාවේ සිඩ්නි නුවරින් මිලදී ගත් නවීන සුඛෝපභෝගී යොට් (Yacht) යාත්‍රාවක් ඉදිරි සති කිහිපය තුළ දිවයිනට ගෙන ඒමට නියමිතය.
දේපළ වෙළඳාම ලෝකයට ‘අපනයනය’ කිරීමේ දැක්ම
ඩුබායි, තායිලන්තය සහ මැලේසියාව වැනි රටවල් අනුගමනය කළ ක්‍රමවේදය ශ්‍රී ලංකාවටද ක්‍රියාත්මක කළ හැකි බව පෙන්වා දෙන ඒ මහතා, ඕස්ට්‍රේලියාව, ඇමරිකාව සහ කැනඩාව වැනි රටවල ආයෝජකයින් ශ්‍රී ලංකාව දෙස දැඩි උනන්දුවකින් බලන බව සඳහන් කළේය.
“අපි පිටරටකට ගොස් මුලින්ම ප්‍රවර්ධනය කරන්නේ අපේ රටයි. ඩොලර් 250,000කට වැඩි ආයෝජන සඳහා රජය වසර 10ක වීසා ලබාදීම ඉතා විශිෂ්ට පියවරක්. විදේශිකයෙක් මෙරටින් මහල් නිවාසයක් ගත් විට එය රටින් රැගෙන යන්නේ නැහැ; ඔවුන් නැවත නැවතත් මෙරටට පැමිණ මුදල් වියදම් කරනවා, කුලී ආදායම් හරහා රටට ඩොලර් ගලා එනවා.”
කොටස් වෙළඳපොළට වඩා Real Estate ආයෝජනයෙන් ලාභ ලබන්නේ කෙසේද?
ප්‍රයිම් සමූහය විසින් මෙතෙක් නිම කරන ලද ව්‍යාපෘති දෙස බැලීමේදී, දේපළ වෙළඳාම හුදෙක් පදිංචියට පමණක් නොව නිසැක ලාභයක් ගෙන දෙන විශිෂ්ට ආයෝජනයක් බව මැනවින් තහවුරු වේ. ඒ බව සංඛ්‍යාලේඛන සහිතව පැහැදිලි කළ ප්‍රේමලාල් බ්‍රහ්මණගේ මහතා පෙන්වා දුන්නේ, ගම්පහ ප්‍රදේශයේ රුපියල් මිලියන 10ත් 12ත් අතර මුදලකට ලබාදුන් නිවාස ඒකකයක වත්මන් වටිනාකම රුපියල් මිලියන 36ක් දක්වා තුන් ගුණයකින් ඉහළ ගොස් ඇති බවයි. එසේම මුල් කාලයේ රුපියල් මිලියන 40කට අලෙවි වූ ’43 By The Sea’ ව්‍යාපෘතියේ දේපළක වත්මන් අගය රුපියල් මිලියන 85ක් දක්වාත්, රුපියල් මිලියන 50කට මිලදී ගත් සාමාන්‍ය මහල් නිවාසයක වටිනාකම රුපියල් මිලියන 125ක් දක්වාත් 100%කටත් වඩා අධික ලාභයක් ලබමින් ඉහළ ගොස් තිබේ. ප්‍රාග්ධන ලාභයට අමතරව කුලී ආදායම් අංශයෙන්ද සුවිශේෂී ප්‍රතිලාභ වාර්තා වන අතර, රුපියල් මිලියන 23කට මිලදී ගත් මුහුද පෙනෙන මහල් නිවාසයකින් පසුගිය මාස 12 තුළ පමණක් රුපියල් මිලියන 10ක දැවැන්ත කුලී ආදායමක් උපයා ගැනීමට එක් ආයෝජකයෙකු සමත් වූ බවද ඒ මහතා වැඩිදුරටත් අනාවරණය කළේය.
“කොටස් වෙළඳපොළේ ආයෝජනය කිරීමේදී සම්පූර්ණ මුදලම එකවර යෙදවිය යුතුයි. නමුත් දේපළ ආයෝජනයකදී රුපියල් මිලියන 50ක නිවසකට ඔබ මුලින් ගෙවන්නේ මිලියන 10ක් වුවත්, වටිනාකම ඉහළ යන්නේ සම්පූර්ණ මිලියන 50ට සාපේක්ෂවයි. මෙය කඩදාසියක සටහන් වන ලාභයක් නොව ස්පර්ශ කළ හැකි සැබෑ වත්කමක්.”
දිවයින පුරා දැවැන්ත ඉදිකිරීම් රැල්ලක්
මේ වන විට ප්‍රයිම් සමූහය විසින් රට පුරා ඉඩම් සංවර්ධනයට අමතරව නිවාස සහ මහල් නිවාස 4,500කට අධික සංඛ්‍යාවක් ඉදි කරමින් පවතින බව ප්‍රේමලාල් බ්‍රහ්මණගේ මහතා සඳහන් කළේය:
- කොළඹ 05 තිඹිරිගස්යාය: ඒකක 350ක දැවැන්ත නිවාස සංකීර්ණය
- කොළඹ 07 එලිසබෙත්: සුඛෝපභෝගී ඒකක 225ක්
- කොළඹ 09: තවත් ඒකක 550ක නව ඉදිකිරීම්
- කිරිබත්ගොඩ Yolo ව්‍යාපෘතිය: නව පරපුර ඉලක්ක කර ලංකාවේ ප්‍රථම වතාවට බෝලිං (Bowling) පහසුකම් සහිතව ඉදිවන නිවාස ඒකක 48
- තලවතුගොඩ හා කඩවත: ‘බ්ලොසම්’ (නිවාස 225), ‘රිෆ්ලෙක්ෂන්’ සහ විලා 75ක නව ව්‍යාපෘති
ශ්‍රී ලංකාවේ අනාගතය: කලාපීය ආයෝජන තෝතැන්නක්
මැදපෙරදිග පවතින අර්බුදකාරී වාතාවරණය හමුවේ ජාත්‍යන්තර ආයෝජකයින් වඩාත් ආරක්ෂිත කලාප සොයමින් සිටින බවත්, ඉන්දියාවේ සහ චීනයේ වර්ධනය වන ඉහළ ආදායම්ලාභී ප්‍රජාව මෙන්ම විශ්‍රාමික ජීවිතය ගත කිරීමට බලාපොරොත්තු වන විදේශිකයන් ආකර්ෂණය කර ගැනීමට ශ්‍රී ලංකාවට ස්වර්ණමය අවස්ථාවක් උදාවී ඇති බවත් ඒ මහතා අවධාරණය කරයි.
රජය විසින් නීතිමය රාමු ලිහිල් කර ආයෝජන ක්‍රියාවලිය වඩාත් කඩිනම් කරන්නේ නම්, සංචාරක සහ දේපළ වෙළඳාම් ක්ෂේත්‍ර ඒකාබද්ධ කරමින් රටේ ආර්ථිකය නව මානයකට ඔසවා තැබිය හැකි බව ප්‍රයිම් ගෲප් නිර්මාතෘ ප්‍රේමලාල් බ්‍රහ්මණගේ මහතා විශ්වාසය පළ කරයි.
මූලාශ්‍රය: Conversations with Alanki වැඩසටහන ඇසුරිනි විශේෂාංග අංශය | HariDeshaya.lk