නීති විරෝධී MTFE පිරමීඩ ආයතනයේ අධ්යක්ෂවරයකු ලෙස කටයුතු කරමින් සාමාන්ය ජනතාවගේ මුදල් කෝටි ගණනින් වංචා කළ බවට චෝදනා ලැබ සිටින රන්දුනු දේවගේ දුමින්ද තුෂාර ජයවර්ධන නමැති සැකකරු ලබන 17 වනදා දක්වා යළි රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම මහතා අද (03) නියෝග කළේය.
අපරාධ පරීක්ෂණ දෙපාර්තමේන්තුව (CID) විසින් සිදුකරන ලද දීර්ඝ විමර්ශනවලදී සැකකරු සතුව තවත් රහසිගත බැංකු ගිණුම් දෙකක් පවතින බව අනාවරණය වී ඇත. මෙම මහා පරිමාණ ජාවාරම දිවයින පුරා ව්යාප්ත කිරීම සඳහා ප්රදේශ 17ක් ආවරණය වන පරිදි ප්රාදේශීය කළමනාකරුවන් 17 දෙනෙකු පත්කර ගනිමින් ජාලයක් පවත්වාගෙන ගොස් ඇති අතර, ඔවුන්ගෙන් සහ තවත් පුද්ගලයින් පස්දෙනෙකුගෙන් මේ වන විටත් ප්රකාශ සටහන් කරගෙන අවසන් බව විමර්ශන නිලධාරීහු අධිකරණය හමුවේ අනාවරණය කළහ.
බිරිඳගේ නිවසින් හමු වූ අභිරහස් ලේඛන සහ රත්තරන් ගනුදෙනු
සැකකරුගේ බිරිඳ, පියා ඇතුළු ප්රධාන සාක්ෂිකරුවන්ගෙන් ප්රකාශ ලබාගෙන අවසන් කර ඇති CID නිලධාරීන්, ඔහුගේ බිරිඳ පදිංචිව සිටින නිවස පරීක්ෂාවට ලක්කර තිබේ. එහිදී නඩුවට අදාළ තීරණාත්මක නඩු භාණ්ඩ සහ ලේඛන රැසක් සොයාගැනීමට විමර්ශකයින් සමත්ව ඇත.
අත්අඩංගුවට ගත් අවස්ථාවේදී සැකකරු භාවිත කළ සුඛෝපභෝගී වාහනයක් අත්අඩංගුවට ගෙන ඇති අතර, පසුව නිවස පරීක්ෂා කිරීමේදී රුපියල් කෝටියකට ආසන්න වටිනාකමකින් යුත් රත්තරන් භාණ්ඩ සහ රන් බිස්කට් මිලදී ගැනීමට අදාළ කුවිතාන්සි තොගයක් විමර්ශන භාරයට ගෙන තිබේ.
අධිකරණය හමුවේ කරුණු දක්වමින් විමර්ශන නිලධාරීන් පෙන්වා දුන්නේ 2024 සහ 2026 කාලසීමාව තුළ මෙම රන් භාණ්ඩ විකුණා ඇති බවයි. මහේස්ත්රාත්වරයා නැගූ ප්රශ්නයකට පිළිතුරු දෙමින් නිලධාරීන් සනාථ කළේ රන් භාණ්ඩ වෙළඳාම සඳහා සැකකරු සතුව කිසිදු නීත්යානුකූල බලපත්රයක් නොතිබූ බවයි.
විත්තියේ ඇප ඉල්ලීම සහ මහේස්ත්රාත් අණ
සැකකරු වෙනුවෙන් පෙනී සිටි නීතිඥවරයා අධිකරණයෙන් ඉල්ලා සිටියේ ප්රධාන සාක්ෂිකරුවන්ගේ ප්රකාශ ලබාගෙන අවසන් බැවින් සහ සැකකරු ශ්රී ලංකා මහ බැංකුවට මෙන්ම CIDයටද පූර්ණ සහයෝගය ලබාදී ඇති බැවින් ඕනෑම ඇප කොන්දේසියක් යටතේ මොහුව මුදාහැරීමට කටයුතු කරන ලෙසයි. රන් මිල අඩු කාලයේ මිලදී ගෙන මිල වැඩි වූ විට ඒවා නැවත අදාළ ස්ථානයටම විකිණූ බවත්, ඒ පිළිබඳ තොරතුරු ප්රකාශවල ඇතුළත් කර ඇති බවත් විත්තියේ නීතිඥවරයා වැඩිදුරටත් පැවසීය.
කෙසේ වෙතත්, ඉදිරිපත් වූ කරුණු දීර්ඝ ලෙස පරීක්ෂා කළ ප්රධාන මහේස්ත්රාත්වරයා, සැකකරු විසින් සිදුකර ඇති බව කියන මෙම මහා පරිමාණ පිරමීඩ වංචාව, රත්රන් මිලදී ගත් සහ විකුණු ස්ථාන මෙන්ම ඒ සඳහා අරමුදල් උපයාගත් ආකාරය පිළිබඳව පුළුල් හා විධිමත් විමර්ශනයක් පවත්වන ලෙස අපරාධ පරීක්ෂණ දෙපාර්තමේන්තුවට නියෝග කරමින් සැකකරු යළි රක්ෂිත බන්ධනාගාරගත කිරීමට තීන්දු කළේය.