විද්‍යාත්මක සාක්ෂි සහ මතවාදී ඝට්ටනය අතර සිරවූ සත්‍යය
යාපනයේ චෙම්මනි (සිත්තුපත්ති) භූමියේ සිදුකරන ලද කැණීම් සම්බන්ධයෙන් මහාචාර්ය රාජ් සෝමදේව ප්‍රමුඛ පුරාවිද්‍යා කණ්ඩායම විසින් ඉදිරිපත් කළ අතුරු වාර්තාවත් සමඟ, මෙම සිදුවීම නවතම නෛතික සහ මතවාදී අර්බුදයක් බවට පත්ව ඇතැයි අද සන්ඩේ ටයිම්ස් පුවත් වාර්තාව මගින් කියැවේ. කාලයක් තිස්සේ ගොඩනැගූ “සමූහ මිනීවළක්” පිළිබඳ ආඛ්‍යානය, විද්‍යාත්මක සහ පුරාවිද්‍යාත්මක සාක්ෂි මගින් අභියෝගයට ලක්වීම මෙහි මූලික ගැටුමට හේතු වී ඇත.
පුරාවිද්‍යාත්මක සහ විද්‍යාත්මක සොයාගැනීම්
දින අසූවකට අධික කාලයක් සිදුකළ කැණීම්වලින් මිනිස් ඇටසැකිලි 584ක් සහ පුරාවස්තු 170ක් සොයාගෙන ඇති අතර, වාර්තාව පෙන්වා දෙන්නේ මෙම භූමිය ලොව පුරා දක්නට ලැබෙන රහසිගත සමූහ මිනීවළකට වඩා “විධිමත් සුසාන භූමියක” (formal burial ground) ලක්ෂණ පෙන්නුම් කරන බවයි. වසංගතයක් හෝ ස්වභාවික ව්‍යසනයක් වැනි තත්ත්වයක් යටතේ සිදුකළ කඩිනම් භූමදානයන් මීට හේතු විය හැකි බව එහි සඳහන් වේ.
කැණීම්වලින් 1920 සිට 1994 දක්වා කාලයට අයත් කාසි හමුවීම සහ අංක 25 දරන ඇටසැකිල්ල අසලින් ප්ලාස්ටික් බෑගයක්, සපත්තුවක් සහ මිනී පෙට්ටියක කොටස් යැයි සැකකළ හැකි ද්‍රව්‍ය හමුවීම හරහා මෙය සාමාන්‍ය ඝාතනයකින් පසු සඟවා දැමූ භූමියකට වඩා වෙනස් සන්දර්භයක් සහිත ස්ථානයක් බව පුරාවිද්‍යා කණ්ඩායමේ නිරීක්ෂණය වී තිබේ.
අගතියට පත් පාර්ශ්වයේ ප්‍රතිචාරය සහ නෛතික මැදිහත්වීම
මෙම විද්‍යාත්මක සොයාගැනීම් ප්‍රතික්ෂේප කරමින්, අතුරුදන්වූවන්ගේ පවුල් වෙනුවෙන් නීතිඥ කස්තුරි අහලංකන් හරහා යාපනය මහේස්ත්‍රාත් අධිකරණයට මෝසමක් ඉදිරිපත් කර ඇත. අගතියට පත් පාර්ශ්වය පෙන්වා දෙන්නේ අදාළ ස්ථානය නිල සුසාන භූමියක් ලෙස කිසිදු සාක්ෂියක් නොමැති බවත්, කුඩා දරුවෙකු වඩාගත් වැඩිහිටියෙකුගේ ඇටසැකිලි වැනි දර්ශන සාමාන්‍ය භූමදානයකට නොගැලපෙන බවත්ය. මහාචාර්ය සෝමදේව සිය පෙර අතුරු වාර්තා තුනේම භාවිත කළ “සමූහ මිනීවළ” යන වචනය මෙම වාර්තාවෙන් හිතාමතාම ඉවත් කර ඇති බවට ඔවුහු චෝදනා කරති.
මතවාදයන් සහ සාක්ෂි අතර ගැටුම
මෙම සමස්ත ක්‍රියාවලිය හරහා පැහැදිලි වන්නේ, දේශපාලනික සහ ජාත්‍යන්තර මැදිහත්වීම් සහිත සංවේදී ගැටලුවක්, අපක්ෂපාතී විද්‍යාත්මක සාක්ෂි ඉදිරියේ නිරාවරණය වන විට ඇතිවන දැඩි සමාජීය සහ නෛතික ඝට්ටනයයි.
වසර ගණනාවක් පුරා විවිධ ජාත්‍යන්තර සහ රාජ්‍ය නොවන සංවිධාන මෙන්ම ඇතැම් මාධ්‍ය ජාලයන් විසින් වින්දිතයන්ගේ වේදනාව පදනම් කරගනිමින් ගොඩනඟන ලද “සමූහ මිනීවළ” නැමති ප්‍රබල මතවාදය මේ වන විට ස්ථාපිත වී හමාරය.
පුරාවිද්‍යාත්මක විමර්ශන හරහා එම මතවාදයට පටහැනි සාක්ෂි ගොඩනැගෙන විට, යම් යම් අරමුණු වෙනුවෙන් ගොඩනැගූ ආඛ්‍යානයන් බිඳවැටීමේ අවදානමක් මතු වේ. එහි අවසන් ප්‍රතිඵලය වී ඇත්තේ, සත්‍යය සොයාගැනීම වෙනුවෙන් පත්කළ විද්‍යාත්මක අධිකාරියට සහ පුරාවිද්‍යාඥයින්ට එරෙහිවම වින්දිතයන් නඩු මගට පිවිසීමයි.
වින්දිත ජනතාවගේ හැඟීම් සහ අපේක්ෂාවන් බාහිර පාර්ශ්වයන්ගේ මතවාදී ව්‍යාපෘති සඳහා මෙවලමක් වී ඇති බවට නැගෙන චෝදනා මෙම සිදුවීම් දාමය හරහා තවදුරටත් තහවුරු වේ. භූමි රේඩාර් (GPR) පරීක්ෂණ හරහා තවත් විසිරුණු දත්ත හමුවී ඇති පසුබිමක, පෙරනිමිති මත පදනම් වූ මතවාදයන්ගෙන් තොරව පුළුල් වෝහාරික සහ පුරාවිද්‍යාත්මක පරීක්ෂණයක් මගින් අවසන් නිගමනයකට එළඹීම අත්‍යවශ්‍ය වේ.
Source: slleader.lk නිරෝමි සුබ්‍රමනියම්