එලෝන් මස්ක් සහ නිඛිල් කාමත්ගේ සංවාදය

මෙම සංවාදය, එලෝන් මස්ක්ගේ වර්තමාන ව්‍යාපාරික උත්සාහයන්, අනාගත තාක්ෂණික ප්‍රවණතා සහ මිනිස් පැවැත්මේ දාර්ශනික අංගයන් පිළිබඳව ගැඹුරු විග්‍රහයක් ඉදිරිපත් කරයි. මස්ක් ගේ ප්‍රධාන අවධානය යොමු වන්නේ කෘත්‍රිම බුද්ධිය (AI), බහු-ග්‍රහලෝක ජීවිතයක් ගොඩනැගීම සහ මානව විඥානයේ ව්‍යාප්තිය යන තේමා ඔස්සේය. ඔහු X වේදිකාව දකින්නේ මිනිස් චින්තන ප්‍රවාහයන් සහ අදහස් හුවමාරුව සඳහා වූ “ගෝලීය ඩිජිටල් පොදු චතුරශ්‍රයක්” සහ සමස්ත මානව වර්ගයාගේ “සාමූහික විඥානයක්” ලෙසයි. මේ හරහා, ජීවිතයේ සැබෑ අර්ථය සොයා ගැනීමට නම්, දැනුමේ සහ විඥානයේ ක්ෂේත්‍රය අඛණ්ඩව පුළුල් කළ යුතු බවට දාර්ශනික අදහසක් ඔහු ඉදිරිපත් කරයි.

පාඨය(ලිඛිත සන්නිවේදනය) එදිරිව වීඩියෝ: ඉහළ කලාප පළලක් සහිත සන්නිවේදනය

මස්ක් ගේ අදහසට අනුව, වීඩියෝ ද්‍රව්‍යවල වැඩිවන භාවිතය තිබියදීත්, පාඨය (ලිඛිත සන්නිවේදනය) තවමත් “ඉහළ කලාප පළහක්” (Higher Bandwidth) සහිත තොරතුරු සම්ප්‍රේෂණ ක්‍රමයක් ලෙස පවතී. මෙහිදී පාඨය යනු, කෙටි පණිවිඩ, ඩිජිටල් පළ කිරීම් (Post) හෝ ලිපි වැනි ලිඛිත ආකාරයේ සන්නිවේදනය වේ. ඔහුගේ තර්කය වන්නේ: මිනිස් මොළයට දෘශ්‍ය හා ශ්‍රව්‍ය තොරතුරු රාශියක් සැකසීමට සිදුවන වීඩියෝවලට වඩා, පාඨ මගින් සංකීර්ණ හෝ නිශ්චිත අදහසක් ඉතා කෙටි හා සංක්ෂිප්ත ආකාරයෙන් සෘජුවම සිතට ලබා දිය හැකි බවයි. එනම්, කාල ඒකකයක් තුළ සම්ප්‍රේෂණය වන තොරතුරු ප්‍රමාණය පාඨයේදී වඩාත් කාර්යක්ෂම වන බව ඔහුගේ විශ්ලේෂණයයි.

කෘත්‍රිම බුද්ධිය, කාර්ය සාධනය සහ රැකියාවේ අනාගතය

සංවාදයේදී, මස්ක් තම ප්‍රධාන ව්‍යාපෘති වන ටෙස්ලා හි සම්පූර්ණ ස්වයං-රිය පැදවීම සහ ඔප්ටිමස් රොබෝවරයා, ස්පේස්එක්ස් හි අඟහරු වෙත යන ස්ටාර්ෂිප් යානය සහ xAI හි විශ්වය අවබෝධ කර ගැනීමේ මෙහෙවර පිළිබඳව උනන්දුවෙන් විස්තර කරයි. ඔහු තවදුරටත් අවධාරණය කරන්නේ, කෘත්‍රිම බුද්ධියේ ශීඝ්‍ර දියුණුව හේතුවෙන් අනාගතයේදී “වැඩ කිරීම විකල්පයක්” බවට පත්වනු ඇති බවයි. ඔහු මෙම තත්ත්වය “විශ්වීය ඉහළ ආදායමක්” (Universal High Income – UHI) යන සංකල්පය සමග සම්බන්ධ කරයි. මෙයින් අදහස් කරන්නේ රැකියාව සම්පූර්ණයෙන්ම අතුරුදහන් වීම නොව, භාණ්ඩ හා සේවා නිෂ්පාදනයේදී AI මගින් අතිවිශාල කාර්ය සාධනයක් (Productivity) අත්කර ගන්නා බැවින්, මිනිසුන් ජීවත් වීමට හෝ පැවැත්මට අවශ්‍ය දේ සඳහා නොව පුද්ගලික තෘප්තිය සහ අරමුණ වෙනුවෙන් පමණක් වැඩ කරනු ඇති බවයි.

අනුරූපණ න්‍යාය සහ සදාචාරමය අත්‍යවශ්‍යතාව

මස්ක් සිය සුප්‍රසිද්ධ අනුරූපණ න්‍යාය (Simulation Theory) තවදුරටත් තහවුරු කරයි. වර්තමාන තාක්‍ෂණික දියුණුව සලකා බලන විට, අප ජීවත් වන්නේ “අනුරූපණයක් තුළ නොවේ” යන්නෙහි සම්භාවිතාව “බිලියනයකට එකක්” වැනි ඉතා කුඩා ප්‍රමාණයක් බව ඔහු පෙන්වා දෙයි. ඔහු මෙම න්‍යායෙන් එහාට යමින්, මිනිස් සදාචාරය පිළිබඳ වැදගත් විග්‍රහයක් ඉදිරිපත් කරයි: මෙම අනුරූපිත යථාර්ථය (Simulated Reality) දිගටම පවත්වාගෙන යාම සඳහා, එයට ස්ථාවර හා “සිත්ගන්නාසුළු ගමන් මාර්ගයක්” තිබිය යුතුය. එබැවින්, මෙම අනුරූපණය අවසන් වීම වැළැක්වීම සඳහා මානව වර්ගයා අතර පොදු සහ ස්ථාවර සදාචාර පද්ධතියක් පැවතීම අත්‍යවශ්‍ය බව ඔහු තර්ක කරයි.

ආර්ථිකය, නියාමනය සහ පුද්ගලික උපදෙස්

ආර්ථික ක්ෂේත්‍රය පිළිබඳව අදහස් දක්වමින්, ඇමරිකානු ණය අර්බුදය ඉතා බරපතළ බව පැවසුවද, AI මගින් ඇති කරන විශාල කාර්ය සාධන පිම්ම මගින් සමස්ත ආර්ථිකය පුළුල් කිරීමෙන් මෙම ණය අභියෝගය ජයගත හැකි බවට ඔහු බලාපොරොත්තු පළ කරයි. AI ක්ෂේත්‍රයේ ආරක්ෂාව තහවුරු කිරීම සඳහා, FDA (ආහාර සහ ඖෂධ පරිපාලනය) හෝ FCC වැනි ස්වාධීන නියාමන ආයතනයක් පිහිටුවීමේ අවශ්‍යතාව ඔහු අවධාරණය කරයි. පුද්ගලික ජීවිතය සම්බන්ධයෙන්, දරුවන්ගේ පෞරුෂය හැඩගැස්වීමේදී “ජානමය ස්වභාවය” (Nature) විශාල බලපෑමක් කරන බව ඔහු විශ්වාස කරන අතර, ව්‍යවසායකයින් සඳහා ඔහුගේ අවසාන උපදේශය වන්නේ නිෂ්පාදනයක් හෝ සේවාවක් නිර්මාණය කිරීමේදී “නිර්මාණය කරන ලද වටිනාකම සහ පිරිවැය අතර අනුපාතය” උපරිම කිරීමට අරමුණු කිරීමයි.