ශ්රී ලංකා ආර්ථිකයේ දැවැන්තම බරක් වී ඇති ශ්රී ලන්කන් ගුවන් සමාගම සම්බන්ධයෙන් නවතම වාර්තාවක් නිකුත් වී තිබේ. 2023/24 මුදල් වර්ෂයේදී රු. බිලියන 3.8ක ලාභයක් වාර්තා කර තිබූ මෙම සමාගම, 2024/25 මුදල් වර්ෂයේදී රු. බිලියන 7.6ක විශාල අලාභයක් වාර්තා කර ඇත.
මෙම හදිසි පාඩු වාර්තා වීම, ජාත්යන්තර මූල්ය අරමුදලේ (IMF) නියාමනයන්ට අනුකූලව ගුවන් සමාගම පෞද්ගලික අංශයට විකුණා දැමීමේ වත්මන් රජයේ මාවත ශක්තිමත් කරන තීරණාත්මක සාධකයකි.
‘හරි දේශය’ අපගේ වෙබ් අඩවිය මීට පෙරද අවධාරණය කළේ, රජයට පාඩු ලබන ව්යාපාර පවත්වාගෙන යාමට නොහැකි බවට ජනාධිපති අනුර කුමාර දිසානායක මහතා විසින් රනිල් වික්රමසිංහ පන්නයේ ප්රකාශ නිකුත් කරමින් සිටීම, ජනතා විමුක්ති පෙරමුණේ සාම්ප්රදායික රාජ්ය අයිතිය පිළිබඳ දේශපාලනය දියව යන ආකාරයකි. මෙම පියවර අවසානයේදී දක්ෂිණ කඳවුරේ (දක්ෂිණාංශික ප්රතිපත්ති) ශක්තිමත් වීමකට මඟ පාදන බව අප පෙන්වා දී තිබුණි.
මෙම පසුබිම යටතේ, ශ්රී ලන්කන් ගුවන් සමාගම 2025 දී විශාල පාඩුවක් වාර්තා කිරීමට හේතු මොනවාද යන්න සහ එහි සැබෑ මූල්ය තත්ත්වය පිළිබඳව BBC සිංහල වෙබ් අඩවිය මගින් නිකුත් කරන ලද විශ්ලේෂණාත්මක වාර්තාව පහතින් උපුටා දක්වමු.
2024 දී රුපියල් බිලියන 3.8ක් ලාභ ලැබූ SriLankan ගුවන් සමාගම 2025 දී බිලියන 7.6ක පාඩු ලැබුවේ ඇයි?
SriLankan ගුවන් සමාගම 2023/24 මූල්ය වර්ෂයේදී රු. බිලියන 3.8ක ලාභයක් වාර්තා කර තිබියදී 2024/25 මූල්ය වර්ෂයේදී රු. බිලියන 7.6ක අලාභයක් වාර්තා කර තිබේ.
මේ වන විට SriLankan ගුවන් සමාගමේ නිල වෙබ් අඩවියේ පළ කර ඇති 2025 මූල්ය වර්ෂයට අදාළ වාර්ෂික වාර්තාවේ මේ බව සඳහන් වේ.
එහි සඳහන් වන ආකාරයට SriLankan ගුවන් සමාගම 2024 අප්රේල් 01 වන දා සිට 2025 මාර්තු 31 දක්වා වන මූල්ය වර්ෂය තුළ රු. බිලියන 7.59ක පාඩුවක් ලබා තිබේ.
එමෙන් ම එම වාර්තාවට අනුව සමාගම 2023 අප්රේල් 01 සිට 2024 මාර්තු 31 දක්වා කාලය තුළ රු. බිලියන 3.87ක ලාභයක් වාර්තා කර ඇතැයි පෙනී යයි.
තව ද, SriLankan සමූහය ද 2025 මූල්ය වර්ෂයේ රු. බිලියන 2.7ක අලාභයක් වාර්තා කර තිබේ. ඒ 2024 මූල්ය වර්ෂය තුළ රු. බිලියන 7.9ක ලාභයක් වාර්තා කර තිබූ පසුබිමක ය.
ශ්රම බළකාය සහ කොටස් හිමිකාරීත්වය
2024/25 මූල්ය වර්ෂය සඳහා SriLankan ගුවන් සමාගමේ මුළු සේවකයින් සංඛ්යාව 6,071ක් වූ අතර, එයින් 67%ක් පුරුෂයින් හා ඉතිරි 33% කාන්තාවෝ වෙති.
එහි සේවය කරන සේවකයන් සංඛ්යාව පහත පරිදි ය:
- කළමනාකරුවන් – 291
- ගුවන් නියමුවන් – 272
- කැබින් කාර්යමණ්ඩලය – 940
- ගුවන් යානා ඉංජිනේරු සහ තාක්ෂණ ශිල්පීන් – 615
- පුහුණු, අභ්යාසලාභී සහ විධායක නිලධාරීන් – 3,953
සේවක පිරිවැය සඳහා 2024/25 මූල්ය වර්ෂය සඳහා රු. මිලියන 32,799ක් වැය කර ඇති අතර, එය පසුගිය වසරට සාපේක්ෂව රු. මිලියන 538ක වැඩි වීමකි.
මීට අමතරව, කාර්ය මණ්ඩල වියදම් ලෙස දක්වා තිබෙන වියදම් සඳහා රු. මිලියන 9,469ක් වැය කර ඇති අතර එම වියදම් පසුගිය වසරට සාපේක්ෂව අඩු වී තිබේ.
2025 මාර්තු 31 වන දිනට SriLankan Airlines Limited සමාගමේ කොටස් හිමිකරීත්වයෙන් 99.77%ක් රජය සතු අතර, 0.09%ක් සේවක අර්ථ සාධක අරමුදල සතු ය. වෙනත් පාර්ශවයන් සතුව ඇති කොටස්වල ප්රතිශතය 0.14%කි.
වියදම් අඩු වී තිබියදී අදායම් අඩු වී ඇත්තේ ඇයි?
SriLankan සමූහයේ වියදම් පෙර වර්ෂයට සාපේක්ෂව අඩු වී ඇති බවක් නිරීක්ෂණය කළ හැකි ය.
- 2023/24 වසර සඳහා රු. මිලියන 339,591.65ක ආදායමක් උපයා ඇති අතර,
- 2024/25 වසරේ උපයා ඇත්තේ රු. මිලියන 303,093.89කි.
- වසර දෙකේ ආදායමේ පරතරය රු. මිලියන 36,498කි.
2024 වසරේදී ශ්රී ලංකාවට පැමිණි සංචාරකයන් සංඛ්යාව ඉහළ ගිය නමුත්, SriLankan ගුවන් සේවය සේවය සපයා ඇත්තේ, ගුවන් මගීන් මිලියන 3.5ක් සඳහා පමණක් වන බවට වාර්ෂික වාර්තාවේ සඳහන් වේ. එය පෙර වසරට සාපේක්ෂව 4%ක හැකිලීමක් ලෙස එහි දක්වා තිබේ.
ඒ අනුව 2024/25 මූල්ය වර්ෂය සඳහා මගී ආදායම රු. බිලියන 234.5ක්ව ඇති අතර එය පෙර මූල්ය වර්ෂයේ රු. බිලියන 276.2කි. එය පෙර වසරට සාපේක්ෂව 15%ක සංකෝචනයකි.
මෙයට ප්රධාන වශයෙන් බලපා ඇති කරුණු වාර්තාවේ මෙසේ දක්වා තිබේ:
- සේවයේ යෙදවිය හැකි ගුවන් යානා සංඛ්යාව සීමිත වීම.
- නඩත්තු කටයුතුවලින් ගුවන් යානා මුදා හැරීමේ ප්රමාදයන්.
- වසර පුරා ගුවන් සමාගම අත්විඳින ලද ඉංජිනේරු කටයුතු ආශ්රිත බාධා හේතුවෙන් ගෝලීය අදායම් අඩු වීම සහ ධාරිතාව අඩු වීම.
- ගුවන් සේවා මට්ටමින් වාර්ෂිකව ලබා ගත හැකි ආසන කිලෝමීටර් සංඛ්යාව (ASK) 5%කින් හැකිලී තිබේ.
අඛණ්ඩ පැවැත්මේ අවිනිශ්චිතතාව
2025 මාර්තු 31 දායින් අවසන් වූ වර්ෂය තුළ SriLankan සමූහය රු. මිලියන 2,735ක ශුද්ධ අලාභයක් ලබා ඇති බව 2025 අගෝස්තු 12 වන දිනැති ජාතික විගණන කාර්යාලය විසින් නිකුත් කළ විගණකාධිපති වාර්තාවේ දැක්වේ.
විගණකාධිපති වාර්තාවෙන් තවදුරටත් පෙන්වා දී ඇත්තේ, සමාගමේ හා සමූහයේ ජංගම වගකීම් ප්රමාණය ජංගම වත්කම් ප්රමාණයට වඩා වැඩි බව ය.
SriLankan ගුවන් සමාගම රු. මිලියන 7,594ක අලාභයක් ලබා ඇති බව ද විගණකාධිපතිවරයා සඳහන් කර තිබේ.
ඒ අනුව පෙන්වා දී ඇති කරුණු අනුව, “සමූහයට/ සමාගමට අඛණ්ඩ පැවැත්මක් පවත්වාගැනීමට ඇති හැකියාව පිළිබඳව සැලකියයුතු සැකයක් ඇති කළ හැකි අවිනිශ්චිතතාවක් පවතින බව,” වාර්තාවේ සඳහන් වේ.
@ උපුටා ගැනීම:BBC Sinhala
පිළිතුරු ලබාදීමේ අයිතිය:-
මෙම වෙබ් අඩවියේ පළවන පුවතක් හේතුවෙන් යම් පුද්ගලයකුට හෝ පාර්ශ්වයක අපහසුතාවක් පැනනගින්නේ නම් හෝ යම් තොරතුරක් නිවැරදි විය යුතු යැයි යම් පුද්ගලයකුට හෝ පාර්ශ්වයකට හැඟෙන්නේ නම්, ඒ වෙනුවෙන් ප්රතිචාර දැක්වීමට සම්පූර්ණ අයිතිය පවතී. harideshaya.lk නිරන්තරයෙන් නිවැරදි තොරතුරු වාර්තා කිරීමට බැඳී සිටින අතර, වෘත්තීය ආචාරධර්මවලට ගරුකරන අන්තර්ජාල වේදිකාවක් ලෙස පිළිතුරු ලබාදීමේ අයිතියට ගරුකරයි.
ඒ වෙනුවෙන් කරුණාකර අපට දැනුම්දෙන්න..
Email:- [email protected]
WhatsApp:- +94771474028