මෝටර් රථ ප්‍රවාහන දෙපාර්තමේන්තුවේ (RMV) පරිගණක දත්ත පද්ධතියෙන් විශාල වශයෙන් තොරතුරු මකා දමමින්, නීති විරෝධී ලෙස එකලැස් කරන ලද වාහන ජාවාරමක් ක්‍රමානුකූලව වසන් කිරීමට දැරූ උත්සාහයක් පිළිබඳ තොරතුරු වලාන මධ්‍යම දූෂණ මර්දන ප්‍රහාරක ඒකකයේ විමර්ශන මඟින් මේ වන විට අනාවරණය වෙමින් පවතී.
පසුගිය ඔක්තෝබර් 29 සහ 30 යන දිනවල පරිගණක විශේෂඥයන්ගේ සහාය ඇතිව සිදුකළ මූලික සෝදිසි කිරීම්වලදී දෙපාර්තමේන්තු දත්ත පද්ධතියෙන් තොරතුරු රැසක් හිතාමතාම මකා දමා ඇති බව තහවුරු විය. මකා දමන ලද දත්ත නැවත ලබාගැනීමේ (Data Recovery) තාක්ෂණික ශක්‍යතාව පවතින බැවින්, සමස්ත ලියාපදිංචි වාහන දත්ත සමුදායම මේ වන විට විමර්ශකයන්ගේ පාලනයට නතු කරගෙන ඇති අතර, ඉදිරි පරීක්ෂණ වෙනුවෙන් අදාළ දත්ත ගබඩාව (Server Room) මේ වන විටත් මුද්‍රා තබා ඇත. ඒ අනුව අද (2) සහ හෙට (3) දෙදින පුරා තීරණාත්මක පරිගණක වෝහාරික පරීක්ෂණ (Digital Forensics) ක්‍රියාත්මක වේ.
බණ්ඩාරගම සුඛෝපභෝගී රථ දෙකෙන් ඇරඹුණු හෙළිදරව්ව
මෙම මහා පරිමාණ ජාවාරමේ සුලමුල කරළියට එන්නේ 2025 ජුනි 28 වනදාය. බණ්ඩාරගම ආදර්ශ පටුමගේ පිහිටි නිවසක සහ සිරිරාජ මාවතේ වාහන සේවා ස්ථානයක සඟවා තිබූ රුපියල් කෝටි තුනකට අධික වටිනාකමකින් යුත් මිට්සුබිෂි මොන්ටෙරෝ (Montero) ජීප් රථයක් සහ කැරවන් (Caravan) වර්ගයේ වෑන් රථයක් වලාන දූෂණ මර්දන ඒකකය මඟින් අත්අඩංගුවට ගනු ලැබීය.
සිද්ධිය සම්බන්ධයෙන් 2025 ජූලි 7 වනදා අත්අඩංගුවට පත් වූයේ කළුතර දිස්ත්‍රික්කයේ හිටපු ප්‍රබල අමාත්‍යවරයකුගේ සමීපතමයෙකි. ඔහු ප්‍රකාශ කර සිටියේ ගම්පහ ප්‍රදේශයේ පුද්ගලයකුගෙන් රුපියල් ලක්ෂ 50කට වෑන් රථයත්, රුපියල් එක්කෝටි දස ලක්ෂයකට ජීප් රථයත් මිලදී ගත් බවයි. එහෙත් එම වාහන අලෙවි කළ බව කියන පුද්ගලයා මේ වන විට ජීවතුන් අතර නොමැති බව පැවසීම හරහා විමර්ශන මඟහැරවීමේ උත්සාහයක් පැවති බව පෙනී යයි.
අංක තහඩු සහ දත්ත මංකොල්ලය
විමර්ශන නිලධාරීන්ගේ දැඩි සැකය මතු වූයේ අදාළ වාහනවල සවිකර තිබූ ලියාපදිංචි අංක පරීක්ෂා කිරීමේදීය:
- මොන්ටෙරෝ ජීප් රථය: RMV පරිගණක පද්ධතියේ තිබූ මුල් දත්ත අනවසරයෙන් සංශෝධනය කර (Data Manipulation) නව ලියාපදිංචි අංකයක් ඊට ඇතුළත් කර ඇති බව හෙළි විය.
- කැරවන් වෑන් රථය: හොරණ, මිල්ලනිය ප්‍රදේශයේ පදිංචි විශ්‍රාමික හමුදා සෙබළෙකු සතු නීත්‍යානුකූල වෑන් රථයක අංකයම ව්‍යාජ ලෙස යොදා තිබිණි.
නීති විරෝධී ලෙස මෙරටට ගෙන්වා එකලැස් කළ වාහන, රාජ්‍ය ලේඛනගත පද්ධතිය තුළට කූට ලේඛන මඟින් ඇතුළු කර නීත්‍යානුකූල කිරීමට RMV අභ්‍යන්තරයේ සිටින නිලධාරීන් කණ්ඩායමක් සෘජුවම හවුල් වී ඇති බවට පානදුර මහේස්ත්‍රාත් අධිකරණය හමුවේ සාක්ෂි ගොනු වන්නේ මෙකී පසුබිම තුළය.
ප්‍රබල තාක්ෂණික මෙහෙයුමක් ක්‍රියාත්මකයි
මකා දැමූ සාක්ෂි ගොඩගැනීම සහ ජාවාරමට සම්බන්ධ අභ්‍යන්තර නිලධාරීන් නීතියේ රැහැනට හසුකර ගැනීම සඳහා පානදුර මහේස්ත්‍රාත් අධිකරණයේ සෝදිසි වරෙන්තුවක් මත විශේෂ ඒකාබද්ධ මෙහෙයුමක් දියත් කර ඇත.
ප්‍රධාන පොලිස් පරීක්ෂක මහේන්ද්‍ර පෙරේරා මහතාගේ මෙහෙයවීමෙන් යුත් වලාන දූෂණ මර්දන බළකායට අමතරව:
- කොළඹ විශ්වවිද්‍යාලයේ පරිගණක පීඨයේ (UCSC) විශේෂඥයන්,
- ශ්‍රී ලංකා පරිගණක හදිසි ප්‍රතිචාර සංසදයේ (SLCERT) සයිබර් විමර්ශකයන්,
- ශ්‍රී ලංකා ටෙලිකොම් ආයතනයේ පරිගණක විද්‍යා විශේෂඥ ඉංජිනේරුවන්,
මෙම ඩිජිටල් වෝහාරික පරීක්ෂාව සඳහා එක්ව සිටිති. මෙරට මෝටර් රථ ලියාපදිංචි කිරීමේ ක්‍රියාවලිය තුළ වසර ගණනාවක් තිස්සේ මුල් බැසගෙන තිබූ දැවැන්ත දූෂණ ජාලයක තොරතුරු මෙම විමර්ශනය හරහා නුදුරේදීම නිරාවරණය වනු ඇත.