2022 වසරේ පැවැති උද්ඝෝෂණයකදී අධිකරණ නියෝග කඩ කළ බවට චෝදනා ලැබ සිටින හිටපු පාර්ලිමේන්තු මන්ත්රී හිරුණිකා ප්රේමචන්ද්ර ඇතුළු දෙදෙනෙකු වහාම අත්අඩංගුවට ගෙන අධිකරණයට ඉදිරිපත් කරන ලෙස කොටුව මහේස්ත්රාත් පසන් අමරසේන මහතා අද (15) නියෝග කළේය.
මෙම නියෝගය නිකුත් කරනු ලැබුවේ අදාළ නඩුව විවෘත අධිකරණයේ කැඳවූ අවස්ථාවේදී විත්තිකාර හිරුණිකා ප්රේමචන්ද්ර පෙනී නොසිටීම හේතුවෙනි.
සිද්ධියේ පසුබිම
මෙම නඩුවට පාදක වී ඇත්තේ 2022 ජූලි මස 09 වනදා හිටපු ජනාධිපති රනිල් වික්රමසිංහගේ පෞද්ගලික නිවසට ගිනි තැබීමේ සිදුවීමට දින දෙකකට පෙර, එනම් 2022 ජූලි 07 වනදා පවත්වන ලද උද්ඝෝෂණයකි. එම විරෝධතාවයේදී අධිකරණය මගින් පනවා තිබූ නියෝග උල්ලංඝනය කළ බවට මන්ත්රීවරිය ඇතුළු පිරිසකට චෝදනා එල්ල වී තිබේ.
අධිකරණ ක්රියාමාර්ගය
අද දින නඩුව කැඳවූ අවස්ථාවේදී අධිකරණය මගහැර සිටි හිරුණිකා ප්රේමචන්ද්ර සහ තවත් සැකකරුවෙකු අත්අඩංගුවට ගැනීමට වරෙන්තු නිකුත් කළ අතර, විත්තිකාරිය අධිකරණයට ඉදිරිපත් කිරීමට අපොහොසත් වීම සම්බන්ධයෙන් කරුණු දැක්වීමට ඇයගේ ඇපකරුවන් වෙතද අධිකරණය නොතීසි නිකුත් කරන ලදී.
කෙසේ වෙතත් මෙම සිද්ධියටම අදාළව ඇප මත මුදාහැර සිටින සෙසු සැකකරුවන් 10 දෙනා (නිරූපමා කරුණානායක, සප්නා දීපිසිකා ඇතුළු පිරිස) අද දින අධිකරණයේ පෙනී සිටියහ.
ඉහත සිද්ධිය පමනක් නොව මීට පෙර අවස්ථා ගණනාවකදී හිරුනිකා ප්රේමචන්ද්ර පොලීසිය විසින් අත්අඩංගුවට ගෙන ඇති අතර 2015 වසරේ ආණ්ඩු බලයේ සිටියදී දෙබටගොඩ ප්රදේශයේ තරුණයෙකු ඩිපෙන්ඩර් රථයකින් පැහැරගෙන ගොස් අයුතු ලෙස සිර කිරීම සහ කුමන්ත්රණය කිරීම ඇතුළු චෝදනා 18කට ඇය වරදකාරිය විය. එම පැහැරගැනීමේ සිද්ධියට අදාලව 2024 ජුනි 28 වැනිදා කොළඹ මහාධිකරණ විනිසුරු අමල් රණරාජා මහතා විසින් වසර තුනක බරපතල වැඩ සහිත සිර දඬුවමක් සහ රුපියල් 360,000ක දඩයක් නියම කරන ලදී.
දේශපාලන සහ නීතිමය බලපෑම
සමගි ජන බලවේගයේ ප්රබල ක්රියාකාරිනියක වන හිරුණිකා ප්රේමචන්ද්රට එරෙහිව මෙලෙස වරෙන්තු නිකුත් වීම, 2022 අරගල සමයේ සිදු වූ සිදුවීම් සම්බන්ධයෙන් ක්රියාත්මක වන නීතිමය ක්රියාවලියේ තීරණාත්මක අවස්ථාවකි. මීට පෙරද විවිධ අවස්ථාවල අධිකරණ නියෝග සම්බන්ධයෙන් ඇය දැඩි ස්ථාවරයක සිටි අතර, මෙම වරෙන්තුව ක්රියාත්මක කිරීම සහ ඉදිරි නඩු වාරයන් පිළිබඳව දේශපාලන ක්ෂේත්රයේ දැඩි අවධානයක් යොමුව තිබේ.