කොළඹ 05, හැව්ලොක් පාරේ ඉදි කිරීමට යෝජිත දැවැන්ත නේවාසික සංවර්ධන ව්යාපෘතියක් සම්බන්ධයෙන් නිකුත් වූ විශේෂ රහස්ය වාර්තාවක් මගින් නාගරික සංවර්ධන රෙගුලාසි බරපතල ලෙස උල්ලංඝනය වී ඇති ආකාරය අනාවරණය කර තිබේ. මෙම ව්යාපෘතිය සඳහා අනුමැතිය ලබා දීමේදී පවතින නීතිමය රාමුවෙන් බැහැරව කටයුතු කර ඇති බව එම වාර්තාව වැඩිදුරටත් පෙන්වා දෙයි.
මහල් 23ක් වෙනුවට මහල් 41කට අනුමැතිය?
වාර්තාවට අනුව, අදාළ ඉඩමේ හයිලෙවල් මාර්ගයට මුහුණලා ඇති සැබෑ පළල මීටර් 28.6 කි. පවතින රෙගුලාසි අනුව මෙවැනි ඉඩමක ඉදිකළ හැකි උපරිම උස මීටර් 75ක් හෙවත් මහල් 23ක් පමණ වේ.
කෙසේ වුවද, නාගරික සංවර්ධන අධිකාරියේ 2021 අංක 50(1) රෙගුලාසිය අවභාවිත කරමින්, ඉඩමේ මුහුණත මීටර් 41ක් ලෙස උපකල්පනය කර මීටර් 128ක උසක් (මහල් 41ක්) සඳහා අනුමැතිය ලබා දී ඇත.
නේවාසික කලාපයට එල්ල වන බලපෑම
මෙම ව්යාපෘතිය පිහිටි ඉඩම වටා ඇති ප්රදේශයෙන් 70%ක්ම අයත් වන්නේ ‘විශේෂ ප්රාථමික නේවාසික සංවර්ධන කලාපයට’ (SPRZ) ය. එම කලාපය තුළ මෙවැනි අධි උස ගොඩනැඟිලි ඉදිකිරීම ප්රවර්ධනය නොකරන අතර, එහි කලාප සංගුණකය වන්නේ 1.75 කි.
ඉඩම පිටුපස පිහිටි මීටර් 6ක් පළල ‘ක්ලේසන් ප්ලේස්’ (Classen Place) මාර්ගය මෙම උස වැඩි කරගැනීම සඳහා යොදාගෙන තිබුණද, එය මීටර් 200ක දුරකින් අවසන් වන (Dead End) මාර්ගයක් බව වාර්තාව පෙන්වා දෙයි.
ප්රවාහන සැලැස්මේ කොන්දේසි
නාගරික සංවර්ධන අධිකාරියේ ප්රවාහන සැලසුම් කමිටුව විසින් 2025 ජූලි 15 දින ලබා දුන් අනුමැතියට අනුව, ව්යාපෘතියේ ඉදිකිරීම් හෝ මෙහෙයුම් කටයුතු සඳහා ‘ක්ලේසන් ප්ලේස්’ මාර්ගයෙන් කිසිදු ඇතුළුවීමේ හෝ පිටවීමේ ද්වාරයක් (Gate) සැපයිය නොහැක.
වාර්තාවේ නිර්දේශ
අදාළ රහස්ය වාර්තාව මගින් අවධාරණය කරන්නේ:
- මෙම ඉඩම සඳහා අංක 50 රෙගුලාසිය ආදේශ කිරීම නිවැරදි නොවන බව.
- ඉඩමේ කිසිදු ස්ථානයක පළල මීටර් 40ක් නොමැති බැවින් වැඩි කළ උස ලබා දීම නීත්යානුකූල නොවන බව.
- හයිලෙවල් මාර්ගයේ මුහුණතට සාපේක්ෂව පමණක් ගොඩනැඟිල්ලේ උස තීරණය කළ යුතු බව.
මෙම ව්යාපෘතිය Home Lands Skyline (Pvt.) Ltd සමාගම විසින් සිදු කිරීමට යෝජිත එකක් බව ලේඛනවල සඳහන් වේ.
