නේවාසික රෝගීන්ට වැඩි මිලට ඖෂධ විකිණීම: ආසිරි රෝහලේ අධ්‍යක්ෂ මණ්ඩලය අධිකරණයට කැඳවයි

කොළඹ ප්‍රධාන පෙළේ පෞද්ගලික රෝහලක් වන ආසිරි රෝහලේ නේවාසික රෝගියකුට නියමිත පාලන මිලට වඩා වැඩි මිලට ඖෂධ විකිණීමේ චෝදනාව මත එම රෝහලේ අධ්‍යක්ෂ මණ්ඩලය අධිකරණය හමුවට කැඳවීමට මාලිගාකන්ද මහේස්ත්‍රාත් ජනිතා රෝෂනී පෙරේරා මහත්මිය පසුගියදා (21) නියම කළාය.

විත්තිකාර රෝහල සහ එහි අධ්‍යක්ෂවරුන් වෙනුවෙන් ඉදිරිපත් වූ මූලික විරෝධතාවන් ප්‍රතික්ෂේප කරමින් මහේස්ත්‍රාත්වරිය මෙම නියෝගය නිකුත් කළාය.

නඩුවේ පසුබිම

2023 පෙබරවාරි 07 වැනිදාත් 19 වැනිදාත් අතර කාලය තුළ නාරාහේන්පිට පිහිටි මෙම පෞද්ගලික රෝහලේ නේවාසිකව ප්‍රතිකාර ලැබූ සමරකෝන් මුදියන්සේලාගේ මන්ත්‍රී කුමාරිහාමි මහත්මියට, රජය විසින් පනවා ඇති උපරිම සිල්ලර මිල ඉක්මවා ඖෂධ අලෙවි කර ඇති බවට මෙහිදී චෝදනා එල්ල වී තිබේ.

නුගේගොඩ හයිලෙවල් පාරේ පදිංචි සනත් කුමාර අතුකෝරල මහතා සෞඛ්‍ය අමාත්‍යාංශයට කරන ලද පැමිණිල්ලකට අනුව, ජාතික ඖෂධ නියාමන අධිකාරියේ (NMRA) ආහාර හා ඖෂධ පරීක්ෂක මහින්ද සිරිකුමාර මහතා විසින් මෙම නඩුව පවරා ඇත. ඖෂධ නියාමන අධිකාරී පනත යටතේ විත්තිකාර රෝහලට, එහි අධ්‍යක්ෂවරුන්ට සහ සේවකයින්ට එරෙහිව වෙන් වෙන් වශයෙන් චෝදනා 11 බැගින් ගොනු කර තිබේ.

අධිකරණයට කැඳවූ අධ්‍යක්ෂ මණ්ඩලය

මෙසේ අධිකරණය හමුවේ පෙනී සිටින ලෙස නියම වූ අධ්‍යක්ෂවරුන් වන්නේ:

• අශෝක පතිරගේ
• මංජුල කරුණාරත්න
• සුදර්ශන් අහංගම
• හැරිස් ප්‍රේමරත්න
• සිවකුමාර් සෙල්ලයියා
• හරේෂ් කුමාර් කයිමාල්
• අජිත් කරුණාරත්න
• විශාල් බාලී (ඉන්දියානු ජාතික)
• අන්තූර් නාන්ද් තදානි (ඉන්දියානු ජාතික)
• බී.ඩී. සඳතිසරු (රෝහල් සේවිකාව)

නඩුව කැඳවූ අවස්ථාවේදී රෝහල් නියෝජිතයෙකු සහ සේවිකාවක පමණක් පෙනී සිටි අතර සෙසු අධ්‍යක්ෂවරුන් පෙනී සිටියේ නැත.

නඩුව යළි මුල සිට ආරම්භ කිරීම

මෙම නඩුව සම්බන්ධයෙන් මීට පෙර 2024 ජනවාරි 17 වැනිදා මාලිගාකන්ද වැඩබලන මහේස්ත්‍රාත් හිමාලි ඒකනායක මහත්මිය හමුවේ රෝහල් නියෝජිතයෙකු වරද පිළිගැනීමෙන් පසු රුපියල් 25,000ක දඩයක් නියම කර තිබුණි.

කෙසේ වෙතත්, එම නියෝගය දෝෂ සහගත බවට පෙන්වා දෙමින් අගතියට පත් පාර්ශවය කළ පැමිණිල්ලක් සලකා බැලූ හිටපු ප්‍රධාන මහේස්ත්‍රාත් ලෝචනි අබේවික්‍රම වීරසිංහ මහත්මිය, පෙර නියෝගය අවලංගු කර නඩු කටයුතු යළි මුල සිට ආරම්භ කිරීමට නියෝග කළාය.

දෙපාර්ශවයේ නීති තර්ක

විත්තිකාර පාර්ශවය වෙනුවෙන් පෙනී සිටි නීතීඥ ජීවන්ත ජයතිලක මහතා මූලික විරෝධතාවක් දක්වමින් කියා සිටියේ, ඖෂධ නියාමන අධිකාරී පනත යටතේ වරදක් සිදු වී මාස 03ක් ඇතුළත නඩු පැවරිය යුතු වුවත්, මෙම නඩුව මාස 09කට පසුව පවරා ඇති බැවින් එය “කාලාවරෝධයට” හසුවන බවයි. එබැවින් නඩුව පවත්වාගෙන යාමට අධිකරණයට බලයක් නොමැති බව ඔහු තර්ක කළේය.

ඊට එරෙහිව කරුණු දැක්වූ නියෝජ්‍ය සොලිසිටර් ජනරාල් ලක්මිණී ගිරිහාගම මෙනවිය, මෙම නඩුව කාලාවරෝධයට හසු වී නොමැති බවත් වහාම චෝදනා පත්‍ර කියවා දිය යුතු බවත් ප්‍රකාශ කළාය.

අගතියට පත් සනත් කුමාර අතුකෝරල මහතා වෙනුවෙන් පෙනී සිටි නීතීඥ රංජිත් හීල්ලගේ මහතා පෙන්වා දුන්නේ, මුලින් වරද පිළිගෙන නඩුව අවසන් කිරීමට උත්සාහ කළ විත්තිකරුවන්ට දැන් සිය ස්ථාවරය වෙනස් කරමින් අධිකරණ බලය පිළිබඳ ප්‍රශ්න කළ නොහැකි බවයි (ප්‍රතිබන්ධන නීතිය). විත්තිකරුවන් විවිධ තර්ක ඉදිරිපත් කරමින් නඩුව ප්‍රමාද කිරීමට උත්සාහ කරන බවද ඔහු සඳහන් කළේය.

අධිකරණ තීන්දුව

ඉදිරිපත් වූ කරුණු සලකා බැලූ මහේස්ත්‍රාත් ජනිතා රෝෂනී පෙරේරා මහත්මිය විත්තියේ මූලික විරෝධතාව ප්‍රතික්ෂේප කරමින්, චෝදනා කියවා දීම සඳහා ලබන නඩු වාරයේදී සියලු අධ්‍යක්ෂවරුන්ට උසාවියේ පෙනී සිටින ලෙස නියම කළාය.

නීති නියෝජනය:

• පැමිණිල්ල වෙනුවෙන්: නියෝජ්‍ය සොලිසිටර් ජනරාල් ලක්මිණී ගිරිහාගම, NMRA නීති නිලධාරී නීතීඥ උදේශිකා ලක්ෂානි.
• අගතියට පත් පාර්ශවය වෙනුවෙන්: නීතීඥ රංජිත් හීල්ලගේ, උදාර විජේසිංහ සහ රන්දුණු හීල්ලගේ.
• විත්තිකාර පාර්ශවය වෙනුවෙන්: නීතීඥ ජීවන්ත ජයතිලක, නිලංක පොල්ගම්පොළ සහ රලිත අමරසේන.