රෙහාන් ජයවික්‍රම ඉල්ලා අස් උනේ බලය නැති නිසාද?

වැලිගම හිටපු නගරාධිපති සහ සමගි ජනබලවේගයේ (SJB) වැලිගම ආසන සංවිධායක ලෙස කටයුතු කළ රෙහාන් ජයවික්‍රම මහතා පක්ෂයෙන් ඉවත් වීමට ගත් තීරණය, ශ්‍රී ලංකාවේ සමකාලීන දේශපාලන ක්‍රියාවලියේ පවත්නා “කෙසේ හෝ බලය ලබාගැනීම” යන පටු අරමුණ පිළිබඳ බරපතල ප්‍රශ්න මතු කරයි. ඔහු පෙන්වා දෙන්නේ පක්ෂයේ වර්තමාන ගමන් මග පිළිබඳව තම හෘද සාක්ෂිය බරපතල විවේචනයක යෙදෙන බවත්, සාම්ප්‍රදායික පක්ෂ දේශපාලනය හුදු ප්‍රහසනයක් පමණක් බවත්, ඊට වඩා පුළුල් ජාතික මෙහෙවරක් අවැසි මොහොත උදාවී ඇති බවත් ය.

ජාතිවාදය සහ වර්ගවාදය වැනි පටු ආකල්ප ප්‍රතික්ෂේප කළ අයෙකු ලෙස ප්‍රකට රෙහාන්, දිවංගත මංගල සමරවීර මහතාගේ දේශපාලන සමීපතමයෙකු වූ අතර, මංගලද පක්ෂ දේශපාලනය පිළිබඳව නොසතුටින් SJB වෙතින් ඉවත්ව ‘රැඩිකල් සෙන්ටර්‘ ආරම්භ කිරීමට මූලික විය. රෙහාන්ගේ මෙම ක්‍රියාව දේශපාලනය යනු හුදෙක් ජයග්‍රහණය කිරීම පමණක්ද? නැතහොත් එය වඩා පුළුල් වූ ජාතික මෙහෙවරක්ද? යන පදනම් ප්‍රශ්නයට පිළිතුරු සෙවීමට මඟ පාදයි.

1. සම්භාව්‍ය දර්ශනය: බලය සහ ප්‍රතිපත්තිය අතර ගැටුම

සම්භාව්‍ය දේශපාලන දාර්ශනිකයන් වන ප්ලේටෝ (Plato) සහ ඇරිස්ටෝටල් (Aristotle) දේශපාලනය දුටුවේ හුදු බල අරගලයක් ලෙස නොව, පරම යහපත (The Good) සාක්ෂාත් කර ගැනීම සඳහා වූ මාර්ගයක් ලෙසය.

• ඇරිස්ටෝටල්: ඔහුට අනුව, මිනිසා ස්වභාවයෙන්ම දේශපාලන සත්වයෙකි (Zoon Politikon). දේශපාලනය යනු යුක්තිසහගත සහ යහපත් රාජ්‍යයක් ස්ථාපිත කිරීමේ උත්තරීතර ක්‍රියාවයි. නායකයාගේ ප්‍රමුඛ අරමුණ විය යුත්තේ, ජයග්‍රහණ හෝ බලය තහවුරු කරගැනීම නොව, ධර්මිෂ්ඨ ලෙස පාලනය කිරීමයි.
• ප්ලේටෝ: ඔහු අවධාරණය කළේ, රාජ්‍යය පාලනය කළ යුත්තේ දැනුම සහ ප්‍රඥාව ඇති දාර්ශනික රජවරුන් විසින් බවයි. ඔවුන් බලය පතන්නේ ස්වකීය ආත්මාර්ථය සඳහා නොව, රාජ්‍යයේ යහපත උදෙසාය.

ඊට හාත්පසින්ම වෙනස් වූ යථාර්ථවාදී (Realpolitik) දැක්මක් ඉදිරිපත් කළ නිකොලෝ මැකියවෙලී (Niccolò Machiavelli) පෙන්වා දුන්නේ, පාලකයාගේ ප්‍රමුඛතම අරමුණ විය යුත්තේ බලය අත්පත් කර ගැනීම සහ එය ආරක්ෂා කර ගැනීම බවයි. ශ්‍රී ලංකාවේ වර්තමාන දේශපාලනය බොහෝ දුරට රෙහාන් විවේචනය කරන ආකාරයේ ‘මැකියවෙලියානු‘ ස්වරූපයක් ගෙන ඇත. එනම්, ප්‍රතිපත්ති පසෙක දමා කෙසේ හෝ ඡන්ද ජයගැනීම සහ බලය තහවුරු කර ගැනීම ප්‍රධාන අරමුණ වී තිබීමයි.

රෙහාන් ජයවික්‍රමගේ ඉල්ලා අස්වීමේ ලිපිය මෙම පටු දේශපාලනයට එරෙහිව නැඟූ හඬකි.

“රාජ්‍ය නායකත්වයේ සහ රාජ්‍ය තන්ත්‍රයේ පවතින අර්බුද හමුවේ, සාම්ප්‍රදායික පක්ෂ දේශපාලනය හුදු අර්ථශූන්‍ය ප්‍රහසනයක් බවට පත්ව ඇති මොහොතක, එකී ව්‍යුහාත්මක සීමාවත් අතික්‍රමණය කොට වඩාත් පුළුල් වූත්, අපක්ෂපාතී වූත් ජාතික මෙහෙවරකට අවතීර්ණ වීම කාලීන ධර්මතාවයක් ලෙස මම දකිමි.”

මෙම ප්‍රකාශය මඟින් පෙන්වා දෙන්නේ, නායකයන්ගේ බලය සහ පැවැත්ම කෙරෙහි ඇති උවමනාව රටේ ව්‍යුහාත්මක අර්බුද හමුවේ අර්ථශූන්‍ය වී ඇති බවයි. ඔහු දකින්නේ පටු බල දේශපාලනය සහ පුළුල් ජාතික මෙහෙවර අතර ඇති වූ ගැටුමකි. නිදහසින් පසු ශ්‍රී ලංකාවේ මුල් කාලීන නායකයින් අතර තිබූ ප්‍රතිපත්තිමය ස්ථාවරත්වය, ක්‍රමයෙන් ජයග්‍රහණය මත පමණක් පදනම් වූ ව්‍යාපාරයක් බවට පත්වීම ඔහු විවේචනය කරයි.

2. රෙහාන්ගේ දේශපාලන ගමන් මගේ හැරවුම් ලක්ෂ්‍යයන්

රෙහාන් ජයවික්‍රම මහතාගේ දේශපාලන ජීවිතයේ ප්‍රතිපත්තිමය ස්ථාවරය සහ පක්ෂ දේශපාලනයේ යථාර්ථය අතර ගැටුම පැහැදිලිව විද්‍යමාන වේ. පළමු හැරවුම් ලක්ෂ්‍යය වන්නේ මහ මැතිවරණයේ පරාජයෙන් පසු ඔහු දේශපාලනයෙන් සමුගැනීම යි. එහිදී ඔහු පෙන්වා දුන්නේ ජනතාව විසින් පක්ෂය ප්‍රතික්ෂේප කරන්නේ නම් දේශපාලනය කර පලක් නොමැති බවයි. මෙය ජනතා වරමට ගරු කරමින්, ජයග්‍රහණය මත පමණක් පදනම් වූ දේශපාලනය ප්‍රතික්ෂේප කිරීමක් ලෙස සැලකිය හැකිය.

දෙවනුව, ඔහු සමගි ජනබලවේගය විසින් පිරිනැමූ තනතුරක් භාරගෙන යළි වැඩ සඳහා එක් විය. මෙම නැවත පැමිණීම, පක්ෂ යාන්ත්‍රණය තුළින් හෝ තමාට අවශ්‍ය ජාතික මෙහෙවර ඉටුකිරීමට හැකි වනු ඇතැයි ඔහු තුළ තිබූ යහපත් බලාපොරොත්තුවක ප්‍රතිඵලයක් ලෙස විග්‍රහ කළ හැකිය. කෙසේ වෙතත්, ඔහුගේ අවසන් තීරණය වූ වර්තමාන ඉල්ලා අස්වීම මගින් පැහැදිලි වන්නේ, යළි පක්ෂයට පැමිණීමෙන් පසුව පවා, ඔහු අපේක්ෂා කළ ප්‍රතිපත්තිමය දේශපාලනය පක්ෂය තුළ ක්‍රියාත්මක කිරීමට ඇති ව්‍යුහාත්මක සීමාව ඔහු අවසානයේ පිළිගෙන ඇති බවයි. ඔහු අවධාරණය කරන පරිදි, මෙම ගැටුම ඔහුගේ හෘද සාක්ෂිය සහ පක්ෂයේ ගමන් මග අතර ඇති වූ දෘෂ්ටිමය විෂමතාවේ ප්‍රතිඵලයයි.

3.  රට ගැන වගකීමක් ද?

රෙහාන් ජයවික්‍රම වැනි තරුණ නායකයින්ගේ ක්‍රියා කලාපය මඟින් පැහැදිලි වන්නේ, දේශපාලනයේ පැවැත්ම තවදුරටත් රඳා පවතින්නේ මැකියවෙලියානු “කෙසේ හෝ බලය” තේමාව මත නොවන බවයි.

ඔහුගේ ලිපිය අවධාරණය කරන්නේ:

“මාගේ පක්ෂය කෙරෙහි පවත්නා බැඳීම අභිබවා යන මාගේ දේශය කෙරෙහි ඇති වගකීම පෙරදැරි කරගෙන, ස්වාධීන දේශපාලන මාවතක් තෝරා ගැනීමේ අභියෝගාත්මක තීරණයට එළැඹීමට මම අදහස් කළෙමි.”

මෙය පෙන්වා දෙන්නේ, දේශපාලනය යනු තනතුරු හෝ ජයග්‍රහණ නොව, පෞද්ගලික අභිමතාර්ථයන් පසෙකලා දේශයට සේවය කිරීමේ වගකීමක් බවයි. රෙහාන්ලාගේ පරම්පරාව මතු කරන්නේ, පක්ෂ දේශපාලනය සහ පටු බල අරගල වෙනුවට ප්‍රතිපත්ති මුල් කරගත්, සැබෑ ජාතික මෙහෙවරක අවශ්‍යතාවයි.

රෙහාන් ජයවික්‍රම ලියූ සම්පූර්ණ ඉල්ලා අස්වීමේ ලිපිය පහත දැක්වේ

ගරු සජිත් ප්‍රේමදාස මන්ත්‍රීතුමා, නායක, සමගි ජන බලවේගය

පක්ෂයේ වර්තමාන දිශානතිය සහ ප්‍රතිපත්තිමය රාමුව පිළිබඳව හුදු පාක්ෂික දේශපාලනික දෘෂ්ටියකින් ඔබ්බට ගොස් ගැඹුරු ස්වයං විවේචනයක යෙදීමේදී, මාගේ හෘද සාක්ෂිය සහ පක්ෂයේ ගමන් මග අතර දැඩි දෘෂ්ටිමය විෂමතාවක් නිර්මාණය වී ඇති බව තේරුම් ගනිමි.

රාජ්‍ය නායකත්වයේ සහ රාජ්‍ය තන්ත්‍රයේ පවතින අර්බුද හමුවේ, සාම්ප්‍රදායික පක්ෂ දේශපාලනය හුදු අර්ථශූන්‍ය ප්‍රහසනයක් බවට පත්ව ඇති මොහොතක, එකී ව්‍යුහාත්මක සීමාවත් අතික්‍රමණය කොට වඩාත් පුළුල් වූත්, අපක්ෂපාතී වූත් ජාතික මෙහෙවරකට අවතීර්ණ වීම කාලීන ධර්මතාවයක් ලෙස මම දකිමි.මාගේ පක්ෂය කෙරෙහි පවත්නා බැඳීම අභිබවා යන මාගේ දේශය කෙරෙහි ඇති වගකීම පෙරදැරි කරගෙන, ස්වාධීන දේශපාලන මාවතක් තෝරා ගැනීමේ අභියෝගාත්මක තීරණයට එළැඹීමට මම අදහස් කළෙමි.

මෙය ස්වාර්ථසාධක දේශපාලන පියවරක් නොව, මාතෘ භූමිය අභියස පවතින කෙටි මධ්‍යම සහ දීර්ඝ කාලීන අභියෝග ජයගැනීම වස්, පෞද්ගලික අභිමතාර්ථයත් පසෙකලා ගනු ලැබූ තීරණයක් බව අවධාරණය කරනු කැමැත්තෙමි.

එනයින්, අද දින සිට බලපැවැත්වෙන පරිදි සමගි ජන බලවේගයෙන් ඉල්ලා අස්වෙන බව මෙයින් දන්වා සිටිමි.

මෙතෙක් මා හට ලබා දුන් සහයෝගයට ස්තූතිවන්ත වන අතර, මෙම තීරණය මාගේ සේවය වඩාත් අර්ථවත් කිරීමේ පරමාර්ථයෙන්, නිදහස් මනසකින් යුතුව ගත් තීරණයක් බව දන්වා සිටිනු කැමැත්තෙමි.

මෙයට,

විශ්වාසී,

රෙහාන් ධනුෂ්ක විජේරත්න ජයවික්‍රම, වර්ෂ 2025 වූ, දෙසැම්බර් මස 6 වන දින, වැලිගමදීය.