ගාල්ල, සියඹලාගහවත්ත ප්රදේශයේදී 16 හැවිරිදි බාලවයස්කාර දරුවකුට නිරුවත් කර සාහසික ලෙස පහරදීමේ සිදුවීමට අදාළ ප්රධාන සැකකරු ඇතුළු ඔහුගේ පවුලේ සිව්දෙනෙකු අත්අඩංගුවට ගෙන රක්ෂිත බන්ධනාගාරගත කර ඇත.
පැහැදිලි වීඩියෝ සාක්ෂි සමාජ මාධ්ය ඔස්සේ සංසරණය වෙමින් මහජන අවධානයට ලක්වීමෙන් අනතුරුව, ගාල්ල පොලීසිය විසින් සිදු කළ විමර්ශනවල ප්රතිඵලයක් ලෙස මෙම අත්අඩංගුවට ගැනීම් සිදු කර තිබේ.
මෙලෙස පහර කෑමට ලක්ව ඇත්තේ අවුරුදු 16ක් වයසැති පිරිමි දරුවෙක් ඔහු දැනට ගාල්ල රෝහලේ ප්රතිකාර ලබයි. මෙම සිදුවීමට එකම පවුලේ අම්මා, තාත්තා, දුව සහ පුතා යන පවුලේ සිව්දෙනාම අත්අඩංගුවට ගෙන ඇති අතර සැකකාර පියා සහ පුතා එළඹෙන 17 වැනිදා දක්වා රක්ෂිත බන්ධනාගාරගත කර ඇත. මව සහ දියණිය රුපියල් ලක්ෂ 5 බැගින් වූ ශරීර ඇප මත මුදා හැරීමට ගාල්ල මහේස්ත්රාත් අධිකරණය නියෝග කර තිබේ.
පොලිස් විමර්ශන සහ අත්අඩංගුවට ගැනීම
වීඩියෝ දර්ශන සමාජ මාධ්ය ජාලාවල වේගයෙන් සංසරණය වීමත් සමග, ගාල්ල පොලීසිය මේ පිළිබඳව පුළුල් විමර්ශනයක් ආරම්භ කළේය. එම විමර්ශනවලට අනුව, දරුවාට පහරදීම සම්බන්ධයෙන් ප්රධාන සැකකරු ඇතුළු පවුලේ සාමාජිකයන් සිව්දෙනෙකු අත්අඩංගුවට ගැනීමට කටයුතු කර ඇත. පහරදීමට ලක්වූ දරුවාගේ මව සඳහන් කරන ආකාරයට, ඇයගේ පුතාට පහරදී ඇත්තේ ඇඳුම් ගලවා, නිරුවත් කරය. දරුවාගේ ජංගම දුරකථනය පවා සැකකරුවන් විසින් උදුරාගෙන ඇති බවට චෝදනා එල්ල වේ.
මෙම අමානුෂික ප්රහාරය සිදුකර ඇත්තේ, දරුවා නිවසේ තිබූ රන් භාණ්ඩ සොරකම් කර ඇති බවට චෝදනා කරමිනි. කෙසේ වෙතත්, දරුවාගේ මව මේ පිළිබඳව අදහස් දක්වමින් පවසන්නේ, දරුවා සතුව රන් භාණ්ඩ තිබුණේ නම්, ඔහු එය අලෙවි කිරීමට හෝ වෙනත් ආකාරයකින් ප්රයෝජනයට ගැනීමට ඉඩ තිබූ බවයි.
මවගේ කඳුළු පිරි හෙළිදරව්ව
පහරදීමට ලක්වූ දරුවාගේ මව විසින් හෙළිදරව් කළ කරුණු අනුව, මෙම සිදුවීම ඉතා කනගාටුදායකය. දරුවා රැකියාව සඳහා ගොස් ඇත්තේ නිවසේ ආර්ථික අපහසුතා හේතුවෙන් නොව, ඔහුටම කියා යමක් උපයාගැනීමේ ආශාවෙනි. දරුවා රන් භාණ්ඩ සොරකම් කළ බවට චෝදනා කරමින්, ඔහුව බලහත්කාරයෙන් රඳවාගෙන පහරදී තිබේ.
දරුවාගේ මව පවසන්නේ, දරුවාගේ දුරකථනයට ඇය අවස්ථා කිහිපයකදීම ඇමතුම් ගත්තද, ඒ කිසිදු අවස්ථාවක දරුවා ඇමතුමට පිළිතුරු දී නොමැති බවයි. පසුව, සැකකරුවන් විසින්ම ඇයට දුරකථනයෙන් අමතා දරුවා රන් භාණ්ඩ සොරකම් කළ බව පවසා ඇත. ඇය පොලීසියට පැමිණිලි කිරීමට උත්සාහ කළද, සැකකරුවන් විසින් ඊට බාධා කර ඇති බවද ඇය සඳහන් කරයි.
මව වැඩිදුරටත් කියා සිටින්නේ, තම දරුවාට පහරදී ඇති ආකාරය සහ ඔහුට එල්ල කර ඇති චෝදනා හේතුවෙන් දරුවාගේ අනාගතයට දැඩි බලපෑමක් එල්ල වී ඇති බවයි. ඇය ඉල්ලා සිටින්නේ තම දරුවාට සාධාරණයක් ඉටුකරන ලෙසයි.
කිසියම් පුද්ගලයෙකු තමන්ට අවශ්ය පරිදි නීතිය අතට ගෙන, නීතිමය ක්රියාමාර්ගයක් ගැනීම වෙනුවට තමා විසින්ම බාලවයස්කරුවෙකුට මෙලෙස දඩුවම් කිරීම කිසිසේත්ම අනුමත කළ නොහැක. මෙය සමස්ත සමාජයේම අවධානයට ලක්විය යුතු බරපතල ප්රශ්නයකි.
දරුවන් යනු රටේ අනාගතයයි. ඔවුන්ගේ ආරක්ෂාව සහ යහපැවැත්ම සහතික කිරීම අප සැමගේ වගකීමකි. මෙවැනි අමානුෂික ක්රියා සමාජයෙන් තුරන් කිරීම සඳහා නීතිය දැඩිව ක්රියාත්මක විය යුතු අතර, අදාළ බලධාරීන් මේ පිළිබඳව වඩාත් අවධානයෙන් කටයුතු කිරීම අත්යවශ්ය වේ. වින්දිත දරුවාට යුක්තිය ඉටුකර, වරදකරුවන්ට නිසි දඬුවම් ලබාදීමට කටයුතු කරන ලෙස ‘හරි දේශය’ දැඩිව අවධාරණය කර සිටී.