ක්‍රිෂ් (Krrish) සමාගමේ මූල්‍ය ගනුදෙනු හරහා පාර්ලිමේන්තු මන්ත්‍රී නාමල් රාජපක්ෂ ඉලක්ක කර ගනිමින් වත්මන් අල්ලස් හෝ දූෂණ විමර්ශන කොමිසම සිදු කරන ක්‍රියාන්විතය පිටුපස ඇත්තේ දැවැන්ත දේශපාලන පළිගැනීමක්ද, එසේත් නැත්නම් FCID හිටපු ප්‍රධානී රවී වෛද්‍යාලංකාර විසින් මුදලට හෝ බලයට යටවී සිදුකළ අතිශය නින්දිත නඩු යටගැසීමක්ද යන බරපතළ ප්‍රශ්නාර්ථය මේ වන විට රට හමුවේ පුපුරා ගොස් හමාරය.
යහපාලන ආණ්ඩු සමයේ රාජපක්ෂවරුන් කොටුකර ගැනීමට ගෙනා ප්‍රධානතම තුරුම්පුවක් වූ ‘ක්‍රිෂ් ගනුදෙනුව’ සම්බන්ධයෙන් මූල්‍ය අපරාධ විමර්ශන කොට්ඨාසය (FCID) එවකට සිදුකළ පරීක්ෂණ සියල්ල අහවර කරමින් නිකුත් කරන ලද අතිශය රහසිගත ලිපියක් මේ වන විට කරළියට පැමිණ තිබේ. ‘අල්ලස් දූෂණය නාස්තියට එරෙහි පුරවැසි බලය’ සංවිධානය මඟින් අල්ලස් කොමිසමේ සභාපතිවරයා වෙත යොමු කර ඇති ලිඛිත පැමිණිල්ලත් සමඟ, ලංකාවේ නීතිය ක්‍රියාත්මක කරන ආයතනවල නිරුවත සහ ද්විත්ව පිළිවෙත මුළුමනින්ම හෙළිදරව් වී ඇත.
රවී වෛද්‍යාලංකාරගේ ‘ක්ලීන් චිට්’ එක
2016 ජූලි 12 දිනැතිව FCID ප්‍රධානී, ජ්‍යෙෂ්ඨ නියෝජ්‍ය පොලිස්පති රවී වෛද්‍යාලංකාරගේ නිල අත්සනින් Krrish Transworks Colombo (Pvt) Ltd ආයතනය වෙත යොමු කර ඇති ලිපිය (ලිපි ගොනු අංක: FCID 01/11301/2016) ඉතා පැහැදිලිවම සඳහන් කරන්නේ කුමක්ද?
“Krrish Transworks සමාගම රග්බි තරගාවලියක් සඳහා ලබාදුන් අනුග්‍රාහකත්වයට අදාළව මේ දක්වා සිදුකළ විමර්ශනවලින් කිසිදු වංචාවක් හෝ අක්‍රමිකතාවක් අනාවරණය වී නොමැති බවත්, එම සමාගමට එරෙහිව කිසිදු නීතිමය පියවරක් ගැනීමට FCID අදහස් නොකරන බවත්, එම සමාගම සමඟ නීත්‍යානුකූල ගනුදෙනුවල නිරත වන පාර්ශ්වයන් වෙත දැනුම් දෙනු ලැබේ.”
එකල පොලිස් දෙපාර්තමේන්තුවේ ඉහළම විමර්ශන නිලධාරියකු විසින් නිල ලිපි ශීර්ෂය යටතේ මෙවැනි සහතිකයක් දුන්නේ නම්, අද වන විට එකී ගනුදෙනුවම මුල් කරගනිමින් නාමල් රාජපක්ෂට එරෙහිව යළි විමර්ශන කරළියට ගෙන එන්නේ කෙසේද?
මෙතැන ඇත්තේ ප්‍රධාන විකල්ප දෙකක් පමණි:
- අල්ලස් කොමිසම සිදු කරන්නේ දේශපාලන දඩයමක්ද? මූල්‍ය අපරාධ විමර්ශන කොට්ඨාසය සම්පූර්ණ පරීක්ෂණයක් පවත්වා, කිසිදු මූල්‍ය වංචාවක් සිදුවී නොමැති බවට ලිඛිතව තහවුරු කර තිබියදී, එම ගොනුවම නැවත විවෘත කරමින් නාමල් රාජපක්ෂ දඩයම් කිරීමට අල්ලස් කොමිසම වලිකන්නේ නම්, එය හුදෙක් දේශපාලන ස්වාමිවරුන්ගේ න්‍යායපත්‍රයකට අනුව සිදුකරන පලිගැනීමක් විනා අන් කිසිවක් නොවේ.
- රවී වෛද්‍යාලංකාර ගනුදෙනුවක් දමා නඩුව යට ගැසුවාද? එසේ නොවී, එම ගනුදෙනුවේ ඇත්ත වශයෙන්ම මූල්‍ය වංචාවක්, අල්ලසක් හෝ රෙදි ගැලවෙන දූෂණයක් තිබුණේ නම්, එදා FCID ප්‍රධානී රවී වෛද්‍යාලංකාර ක්‍රිෂ් සමාගමෙන් යමක් ලබාගෙන, හිතාමතා සාක්ෂි වසං කරමින් මෙවැනි ‘සුදු හුණු ගෑමේ සහතිකයක්’ නිකුත් කළේද? එසේ නම් එය රාජකාරිය අමු අමුවේ පාවාදීමක් සහ නීතිය නැවීමක් නොවේද?
අල්ලස් කොමිසම දැන් කළ යුත්තේ කුමක්ද?
අල්ලස් කොමිසමට සැබෑ කොඳුනාරටියක් සහ අපක්ෂපාතී බවක් තිබේ නම්, වහාම කළ යුත්තේ නාමල් රාජපක්ෂ පස්සේ එළවීමට පෙර, මෙවැනි නීතිවිරෝධී ‘ක්ලීන් චිට්’ එකක් දුන් හිටපු ජ්‍යෙෂ්ඨ නියෝජ්‍ය පොලිස්පති රවී වෛද්‍යාලංකාරව කූඩුවට කැඳවා ප්‍රශ්න කිරීමයි. ඔහු මෙම ලිපිය ලබාදුන්නේ කුමන පදනමකින්ද, ඒ සඳහා ඔහු ලැබූ වරප්‍රසාද මොනවාද යන්න රටට හෙළිදරව් කළ යුතුය.
එක්කෝ අල්ලස් කොමිසම නාමල්ගෙන් නග්නව පලිගන්නා බව පිළිගත යුතුය; නැතහොත් රවී වෛද්‍යාලංකාර නඩුව අමු අමුවේ යටගසා ඇති බව පිළිගෙන ඔහුට එරෙහිව දූෂණ හා වංචා විමර්ශන වහාම දියත් කළ යුතුය. දෙබිඩි නීතියෙන් රටක් පාලනය කළ නොහැක. නීතිය නැවූ නිලධාරීන්ද, නීතිය මෙවලමක් කරගත් දේශපාලකයින්ද එක හා සමානව මහජන අධිකරණය ඉදිරියේ විත්තිකරුවන් විය යුතුය.