අන්තර්ජාල ජාවාරමකට සම්බන්ධ සැකකාර චීන ජාතිකයන් 19 දෙනෙකුගේ විදේශ ගමන් බලපත්ර අධිකරණයට ඉදිරිපත් නොකර මුදා හැරීම සඳහා රුපියල් ලක්ෂ 3ක අල්ලසක් ඉල්ලා සිටීමේ සිද්ධියට අදාළව වැලිකඩ පොලිස් ස්ථානාධිපති (OIC), ප්රධාන පොලිස් පරීක්ෂක සමන් ජයසිංහ ලබන ජූනි මස 9 වැනිදා දක්වා රක්ෂිත බන්ධනාගාරගත කිරීමට කොළඹ ප්රධාන මහේස්ත්රාත් අසංග එස්. බෝදරගම අද (28) නියෝග කළේය.
මෙම දූෂණ ක්රියාව සඳහා තවත් කාන්තාවකගේ සහාය ලැබී ඇති බව විමර්ශන මෙහෙයවන කොළඹ මධ්යම අපරාධ විමර්ශන කාර්යාංශය අද අධිකරණය හමුවේ විශේෂ අනාවරණයක් සිදු කළේය.
චීන ජාතිකයන්ට පලායාමට ඉඩ සැලසීමේ චෝදනාව
පොලිස්පතිවරයාගේ සෘජු නියෝගයකට අනුව කොළඹ මධ්යම අපරාධ විමර්ශන කාර්යාංශය විසින් අත්අඩංගුවට ගත් වැලිකඩ OIC වරයා, අද දහවල් 12:48 ට පමණ කොළඹ ප්රධාන මහේස්ත්රාත් අධිකරණය වෙත ඉදිරිපත් කරනු ලැබීය.
එහිදී විමර්ශන නිලධාරීන් අධිකරණයට දන්වා සිටියේ, අදාළ චීන ජාතිකයන් 19 දෙනා සම්බන්ධයෙන් දින 15ක් යනතුරුත් වැලිකඩ පොලිසිය අධිකරණයට කරුණු වාර්තා කර නොමැති බවයි. එමෙන්ම, අපරාධ විමර්ශන කාර්යාංශයේ නිලධාරීන් මෙම වැටලීම සහ පරීක්ෂණ ආරම්භ කරන අවස්ථාව වන විටත්, සැකකාර විදේශිකයන්ගේ පාස්පෝට් නඩු භාණ්ඩ වශයෙන් අධිකරණයට ඉදිරිපත් කර තිබී නැත.
විමර්ශන නිලධාරීන් අධිකරණය හමුවේ අවධාරණය කළේ,
“ස්ථානාධිපතිවරයා හිතාමතාම අධිකරණය නොමඟ යවමින්, අදාළ චීන ජාතිකයන් 19 දෙනාට පලා යෑමට අවස්ථාව සලසා දී ඇති” බවයි.
තවද, මෙම චීන ජාතිකයන්ගේ විදේශ ගමන් බලපත්ර නැවත ලබාදීමේ කටයුත්ත සඳහා තවත් කාන්තාවක් සම්බන්ධ වී ඇති බවත්, ඇයගෙන් මේ වන විටත් ප්රකාශ සටහන් කරගෙන ඇති බවත් පොලිසිය අධිකරණයට දැනුම් දුන්නේය.
විත්ති පාර්ශවයේ නීතිඥ තර්කය
සැකකාර පොලිස් ස්ථානාධිපතිවරයා වෙනුවෙන් පෙනී සිටි ජනාධිපති නීතිඥ කෞශල්ය නවරත්න මහතා මෙම චෝදනා ප්රතික්ෂේප කරමින් කියා සිටියේ තම සේවාදායකයා වසර ගණනාවක යහපත් චරිතයකින් යුතුව රාජකාරි කළ නිලධාරියෙකු බවයි.
රාජගිරිය ප්රදේශයේදී අත්අඩංගුවට ගත් විදේශිකයන් සම්බන්ධයෙන් විමර්ශන සිදුවෙමින් පැවති බවත්, අදාළ විදේශිකයන් 19 දෙනා දැනට පලාගොස් ඇති බැවින් ඔවුන්ගේ විදේශ ගමන් බලපත්ර සුරක්ෂිතව පොලිස් භාරයේ තිබූ බවත් නීතිඥවරයා තර්ක කළේය. මෙහි පිටුපස සැබෑ සිදුවීමට වඩා වෙනස් තත්ත්වයක් පවතින බවද ඔහු සඳහන් කළේය.
මහේස්ත්රාත්වරයාගෙන් දැඩි නියෝග
ඉදිරිපත් වූ කරුණු සලකා බැලූ ප්රධාන මහේස්ත්රාත් අසංග එස්. බෝදරගම මහතා පහත දැඩි නියෝග නිකුත් කළේය:
- විදේශ ගමන් තහනම: පලාගොස් ඇති බව කියන චීන ජාතිකයන් 19 දෙනාට වහාම ක්රියාත්මක වන පරිදි මෙරටින් පිටවීම තහනම් කරමින් නියෝගයක් නිකුත් කෙරිණි.
- දුරකථන වාර්තා කැඳවීම: සැකකාර ස්ථානාධිපතිවරයාගේ මෙන්ම, විමර්ශනයට ගිය නිලධාරීන්ගේද ජංගම දුරකථන විශ්ලේෂණ වාර්තා (CDR) අධිකරණයට ඉදිරිපත් කරන ලෙස කොළඹ මධ්යම විමර්ශන කාර්යාංශයට නියෝග කළේය.
- පූර්ණ විමර්ශන වාර්තාවක්: සිද්ධියට අදාළ පූර්ණ විමර්ශනයක් සිදුකර ලබන නඩු දිනයේදී (ජූනි 9) ඒ පිළිබඳ සවිස්තරාත්මක වාර්තාවක් ඉදිරිපත් කරන ලෙස නියම කරමින් සැකකරු එදින දක්වා රක්ෂිත බන්ධනාගාරගත කිරීමට නියෝග කළේය.
පසුබිම: රාජගිරියේ දැවැන්ත වැටලීම
මීට පෙර, නීතිවිරෝධී මූල්ය ජාවාරම් සහ අන්තර්ජාල අපරාධවල නිරත වීමේ චෝදනා මත චීනය, වියට්නාමය, මැලේසියාව, මැඩගස්කරය, පිලිපීනය, තායිලන්තය සහ කාම්බෝජය යන රටවලට අයත් විදේශිකයන් 120 දෙනෙකු රාජගිරිය, මැද වැලිකඩ පාරේ පිහිටි මහල් නිවාස සංකීර්ණයකදී වැලිකඩ පොලිසිය විසින් අත්අඩංගුවට ගෙන තිබුණි.
ඔවුන් රක්ෂිත බන්ධනාගාරගත කිරීමෙන් පසු මේ වන විට ඇප මත මුදා හැර සිටින අතර, එම සමස්ත මෙහෙයුමේ පූර්ණ විමර්ශන කටයුතු භාරව කටයුතු කර තිබුණේ ද වංචා චෝදනාවට ලක්ව සිටින වැලිකඩ පොලිස් ස්ථානාධිපතිවරයා විසිනි.
HariDeshayaLk පුවත් සේවය