2026 අගෝස්තු 30 වන දින අලුයම නිහඬ රාත්රිය දෙදරා යමින් නෙල්ලිඅඩිය ප්රදේශයේ පිහිටි විශ්රාමික රාජ්ය නිලධාරියෙකුගේ නිවස වෙත එකපිට එක ගල් වර්ෂාවක් කඩාපාත් වන්නේ ප්රදේශවාසීන් පවා තති කරවමිනි. බලයේ හෝ තනතුරේ අනුහසින් නීතිය අතට ගැනීමට තරම් යම් පිරිසක් එඩිතර වූයේ කෙසේද යන්න සොයාබැලීමේදී හෙළිවන්නේ අපූරු තොරතුරු තොගයකි.
අප කළ සොයාබැලීමේදී තහවුරු වූයේ අගෝස්තු 30 වන දිනට යෙදුණු මෙම ප්රචණ්ඩකාරී ප්රහාරය මෙහෙයවා ඇත්තේ වඩමාරච්චි නිරිත ප්රාදේශීය සභාව නියෝජනය කරන ජාතික ජන බලවේගයේ (NPP) පළාත් පාලන මන්ත්රී චන්ද්රකුමාර් ගනේෂරූපන් (Santhirakumar Kanesaruban) ඇතුළු කල්ලියක් විසින් බවයි. අධික ලෙස මත්පැන් පානය කර පැමිණ ඇති මෙම පිරිස, නිවැසියන්ට මරණීය තර්ජන එල්ල කරමින් නිවසට අනිසි ලෙස ඇතුළු වී ප්රචණ්ඩ ලෙස හැසිරී ඇත. තම නීති විරෝධී ක්රියා සාක්ෂි ලෙස සටහන් වීම වැළැක්වීමට නිවසේ සවිකර තිබූ ආරක්ෂිත කැමරා (CCTV) පද්ධතියටද ගල් ගසා කඩා දමා විනාශ කිරීමට මොවුන් කටයුතු කර තිබේ.
නමුත් සිදුවීමත් සමඟ ක්රියාත්මක වූ නිවැසියන් වහාම 119 හදිසි ඇමතුම් අංකය ඔස්සේ නෙල්ලිඅඩි පොලිස් ස්ථානයට තොරතුරු හෙළි කර ඇත. අගෝස්තු 30 අලුයම 12:45 ට පමණ වහාම ක්රියාත්මක වූ පොලිස් කණ්ඩායමක් අදාළ ස්ථානය වටලා, ප්රහාරයට සම්බන්ධ අදාළ NPP මන්ත්රීවරයා ඇතුළු සැකකරුවන් පිරිස එම ස්ථානයේදීම අත්අඩංගුවට ගත්තේය.
සිදුවීමේ සැබෑ වෙනස සිදුවන්නේ එතැන් සිටය.
පොලිස් ස්ථානය වෙත රැගෙන ආ සැකකරුවන්ගෙන් ප්රශ්න කිරීම් සිදුකළද, අත්අඩංගුවට ගෙන පැය 6ක් යන්නටත් මත්තෙන් (උදෑසන 7.00 වන විට) බරපතල අලාභහානි කිරීම් සහ මරණීය තර්ජන එල්ල කිරීම් චෝදනා ලැබූ මන්ත්රීවරයා ඇතුළු පිරිස ඉතා පහසුවෙන් ‘පොලිස් ඇප’ මත නිදහස් කර යැවීමට පොලිසිය කටයුතු කර තිබේ.
- අනිසි ලෙස නිවසකට කඩාපැනීම, මරණීය තර්ජන එල්ල කිරීම සහ දේපළවලට හානි කිරීම වැනි බරපතල චෝදනා හමුවේ සාමාන්යයෙන් සැකකරුවන් අධිකරණයට ඉදිරිපත් කර රිමාන්ඩ් කරවන පසුබිමක, මෙතරම් ඉක්මනින් පොලිස් ඇප ලැබුණේ කෙසේද?
- අලුයම 12.45 ට අත්අඩංගුවට ගෙන උදෑසන 7.00 වන විට ඇප ලබාදීමට පසුපසින් ක්රියාත්මක වූ නොපෙනෙන දේශපාලන හස්තය කාගේද?
- අදාළ මන්ත්රීවරයා මීට පෙරද නෙල්ලිඅඩි පොලිසියේ නිලධාරීන්ට තර්ජනය කර ඇති බවටත්, ප්රාදේශීය සංවර්ධන කමිටු රැස්වීම්වලදී නොසුදුසු ලෙස හැසිරී ඇති බවටත් වන චෝදනා හමුවේ පක්ෂය මෙතෙක් නිහඬව සිටියේ මන්ද?
නීතියේ ආධිපත්යය සහ යහපාලනය ගැන වේදිකා මත කතා කරන යුගයක, නෙල්ලිඅඩියෙන් වාර්තා වූ මේ සිදුවීම පිටුපස ඇති සැබෑ දේශපාලන ඇතුළාන්තය ඉදිරියටත් සොයාබැලීමට අප සූදානම්.