යක්කල “අපේ නිවහන” කාර්යාලයේ අයිතිය කාටද? ජවිපෙ සහ පෙරටුගාමීන් අතර ඇවිළුණු දේපළ අර්බුදයේ නීතිමය සටන මෙන්න

විශේෂ ගවේෂණාත්මක වාර්තාවකි | HariDeshaya.lk

ශ්‍රී ලංකාවේ වාමාංශික දේශපාලන කරළිය තුළ වසර ගණනාවක් තිස්සේ ඇදී යන ජනතා විමුක්ති පෙරමුණ සහ පෙරටුගාමී සමාජවාදී පක්ෂය අතර මතවාදී ගැටුම, මේ වන විට වඩාත් උණුසුම් මුහුණුවරක් ගනිමින් ගම්පහ දිසා අධිකරණය හමුවට පැමිණ තිබේ. ඒ, යක්කල කිරිඳිවැල පාරේ පිහිටි “අපේ නිවහන” කාර්යාල පරිශ්‍රයේ සැබෑ අයිතිය සහ භුක්තිය කා සතුද යන්න මුල් කරගනිමිනි.

අදාළ දේපළෙහි පවතින තත්ත්වය (status quo) වෙනස් කිරීම හෝ එය වෙනත් තෙවන පාර්ශ්වයකට පැවරීම වළක්වමින්, ගම්පහ අතිරේක දිසා විනිසුරු දුලාන් වීරවර්ධන මහතා විසින් විත්තිකරුවන් විසිදෙනෙකු වෙත වාරණ නියෝගයක් (Enjoining Order) නිකුත් කර ඇත්තේ මෙම නෛතික ගැටුමේ තීරණාත්මක පරිච්ඡේදයක් සනිටුහන් කරමිනි.

රුපියල් ලක්ෂ අටෙන් ඇරඹි ගමන: භාරයක් ලෙස ගත් දේපළ

නඩු වාර්තාවලට අනුව මෙම ගැටලුවේ මූලාරම්භය සටහන් වන්නේ මීට වසර විසි එකකට පෙරය. 2005 සැප්තැම්බර් 30 වන දින යක්කල නගරයට නුදුරින් පිහිටි පර්චස් 21.1ක භූමියක් ජනතා විමුක්ති පෙරමුණේ අරමුදල්වලින් රුපියල් ලක්ෂ අටකට (රු. 800,000/-) මිලදී ගෙන තිබිණි.

දේශපාලන පක්ෂයක් සංස්ථාගත ආයතනයක් නොවන බැවින්, පක්ෂ ව්‍යවස්ථාවට අනුකූලව මෙම ඉඩම මිලදී ගෙන ඇත්තේ එවකට පක්ෂයේ ක්‍රියාකාරිකයකු වූ සපරමාදු හීරළු පතිරැන්නැහැලාගේ කුසුම් ආසිරි තිලකරත්න යන අයගේ නමිනි. එනම්, ඔහු පක්ෂය වෙනුවෙන් එම දේපළ “භාරයක්” (Trust) ලෙස තබා ගත් තැනැත්තා ලෙසයි. ඉන්පසු සාමාජිකයින්ගේ ආධාර මත එහි ගොඩනැගිල්ලක් ඉදිකර “ගම්පහ අපේ නිවහන” නමින් පක්ෂ දිස්ත්‍රික් කාර්යාලය ලෙස පවත්වාගෙන ගොස් ඇත.

2011 දෙකඩ වීම සහ අයිතියේ පැටලැවිල්ල

2011 වසරේදී ජනතා විමුක්ති පෙරමුණ දෙකඩ වී පෙරටුගාමී සමාජවාදී පක්ෂය බිහිවීමත් සමඟ දේශපාලන කරළිය පමණක් නොව, පක්ෂ සම්පත් බෙදී යාම පිළිබඳ ප්‍රශ්නය ද කරළියට ආවේය. ඉඩම තම නමින් ලියාපදිංචි කර තිබූ ආසිරි තිලකරත්න මහතා ද පෙරටුගාමී සමාජවාදී පක්ෂය හා එක්වීම නිසා මෙම පරිශ්‍රය පෙරටුගාමීන්ගේ දිස්ත්‍රික් කාර්යාලය ලෙස දිගටම භාවිත කෙරිණි.

වාචිකව හා ලිඛිතව කළ ඉල්ලීම්වලින් පසු දේපළ ආපසු නොලැබුණු තැන, 2018 වසරේදී ජවිපෙ ප්‍රධාන ලේකම් ටිල්වින් සිල්වා මහතා විසින් ගම්පහ දිසා අධිකරණයේ අංක 3445/L යටතේ නඩුවක් ගොනු කරන ලදී.

එම නඩුවේ තීන්දුව 2022 පෙබරවාරි 28 දින ප්‍රකාශයට පත් කරමින් ගරු අධිකරණය තීන්දු කළේ, මෙම දේපළ ජනතා විමුක්ති පෙරමුණ වෙනුවෙන් භාරයක් ලෙස දරන්නක් බවත්, එය නැවත පක්ෂයේ ලේකම්වරයා වෙත පවරා දිය යුතු බවත්ය. ඒ අනුව 2025 අගෝස්තු 22 දින අංක 257 දරන ඔප්පුව මගින් රුපියල් මිලියන 19.57ක වටිනාකමකට අදාළ දේපළ ටිල්වින් සිල්වා මහතා වෙත නීත්‍යානුකූලව පවරා ඉඩම් රෙජිස්ට්‍රාර් කාර්යාලයේ ලියාපදිංචි කර තිබේ.

2025 සැප්තැම්බර් 02 ගැටුම: නීති පොතෙන් එළියට ආ උණුසුම

නීත්‍යානුකූල ඔප්පුව අතැතිව සිටි ජවිපෙ පාර්ශ්වය සහ වසර 14කට අධික කාලයක් එකී කාර්යාල පරිශ්‍රයේ රැඳී සිටි පෙරටුගාමී සමාජවාදී පක්ෂය අතර දේපළෙහි භුක්තිය මුල් කරගනිමින් සැබෑ අර්බුදය නිර්මාණය වූයේ 2025 සැප්තැම්බර් 02 වනදාය.

• ජවිපෙ ස්ථාවරය: තමන්ට හිමි නීත්‍යානුකූල හිමිකම සහ අධිකරණ තීන්දුව මත පදනම්ව කාර්යාල පරිශ්‍රයේ භුක්තිය ලබාගැනීමට ගිය අවස්ථාවේදී එහි රැඳී සිටි පිරිස කලහකාරී ලෙස බාධා කළ බවට ජවිපෙ පාර්ශ්වයෙන් යක්කල පොලිසියට පැමිණිලි ඉදිරිපත් විය.

• පෙරටුගාමීන්ගේ ස්ථාවරය: ප්‍රවෘත්ති සාකච්ඡා පවත්වමින් පෙරටුගාමී සමාජවාදී පක්ෂයේ නායකයින් චෝදනා කළේ, අධිකරණ නියෝගයක් ක්‍රියාත්මක විය යුත්තේ පිස්කල් නිලධාරීන් හරහා නීත්‍යානුකූලව මිස, පිරිසක් බලහත්කාරයෙන් පැමිණ පහර දී සාමාජිකයින් රෝහල්ගත කරමින් කාර්යාලය නීතිවිරෝධීව අත්පත් කරගැනීමට ආණ්ඩු පාර්ශ්වයට කිසිදු බලයක් නොමැති බවයි.

මහේස්ත්‍රාත් අධිකරණයේ තීරණය: භුක්තිය සහ සැබෑ අයිතිය අතර වෙනස

මෙම ගැටුමෙන් අනතුරුව පෙරටුගාමී සමාජවාදී පක්ෂය ප්‍රාථමික නඩු විධාන සංග්‍රහයේ 66 වගන්තිය යටතේ ගම්පහ මහේස්ත්‍රාත් අධිකරණයට ගිය අතර, මහේස්ත්‍රාත් අධිකරණය සාමය පවත්වා ගැනීමේ අරමුණින් මුලින්ම කාර්යාල පරිශ්‍රය පොලිස් භාරයට පත් කිරීමට පියවර ගත්තේය.

ඉන්පසු 2026 මාර්තු 30 වන දින මහේස්ත්‍රාත් අධිකරණය තීන්දු කළේ, සැප්තැම්බර් 02 දින වන විට දේපළ භුක්ති විඳිමින් සිටියේ පෙරටුගාමී සමාජවාදී පක්ෂය බැවින්, භුක්තිය නැවත ඔවුන්ට ලබාදිය යුතු බවයි.

කෙසේ වෙතත්, මහේස්ත්‍රාත් අධිකරණ නියෝගයේ ඉතා පැහැදිලිව එක් කරුණක් සටහන් විය. එනම්, මහේස්ත්‍රාත් අධිකරණය සලකා බලන්නේ ‘සාමය කඩවීම සහ ඒ වන විට පැවති භුක්තිය’ පමණක් බවත්, ඉඩමේ සැබෑ අයිතිය (Title) කා සතුද යන්න තීන්දු කළ යුත්තේ සිවිල් අධිකරණයක් හමුවේ බවත්ය.

නැවතත් දිසා අධිකරණයට: නව වාරණ නියෝගය

මහේස්ත්‍රාත් අධිකරණයේ එම නිරීක්ෂණයත් සමඟ, තමන් සතු ලියාපදිංචි ඔප්පුව මගින් තහවුරු වන නීත්‍යානුකූල අයිතිය (Title) මත පදනම්ව, පෙරටුගාමී සමාජවාදී පක්ෂයේ කුමාර් ගුණරත්නම්, චමීර කොස්වත්ත, දුමින්ද නාගමුව ඇතුළු 20 දෙනෙකු වගඋත්තරකරුවන් කරමින් ටිල්වින් සිල්වා මහතා ගම්පහ දිසා අධිකරණය හමුවේ මෙම නව නඩුව ගොනු කර ඇත.

මෙම නඩුව මගින් ඉල්ලා ඇත්තේ:

1. දේපළෙහි සැබෑ නීත්‍යානුකූල අයිතිකරු ජවිපෙ ප්‍රධාන ලේකම්වරයා බවට ප්‍රකාශ කිරීම.

2. විත්තිකරුවන්ට ඊට කිසිදු හිමිකමක් නොමැති බව තීන්දු කර ඔවුන් ඉවත් කර භුක්තිය තමන් වෙත භාරදීම.

3. නඩුව විභාග වන තෙක් දේපළෙහි කිසිදු වෙනසක් සිදු කිරීම හෝ තෙවන පාර්ශ්වයකට පැවරීම වැළැක්වීම.

ඉදිරිපත් වූ කරුණු සලකා බැලූ ගම්පහ අතිරේක දිසා විනිසුරු දුලාන් වීරවර්ධන මහතා, නඩුව අවසන් වන තෙක් පරිශ්‍රයේ කිසිදු වෙනසක් සිදු කිරීම වළක්වමින් වාරණ නියෝගයක් ලබාදුන්නේය.

පැමිණිලිකාර ටිල්වින් සිල්වා මහතා වෙනුවෙන් ‘නීතික පාර්ට්නර්ස්’ නීතිඥ සමාගමේ නීතිඥ චමීර හපුතන්ත්‍රී, තනූජ සඳරුවන් සහ නිකිණි මාපිටිගම යන නීතිඥවරුන්ගේ උපදෙස් මත නීතිඥ ඉෂාන් අලවතුරගේ මහතා පෙනී සිටියේය.

දශක දෙකකට ආසන්න කාලයක් පැවති මෙම දේශපාලන දේපළ අරගලයේ නීත්‍යානුකූල අවසානය තීන්දු කිරීමේ බර දැන් යළිත් ගම්පහ දිසා අධිකරණය හමුවේ තැබී තිබේ.