: බලයට වඩා මනුෂ්යත්වය තෝරාගන්නා ලෙස ලෝක නායකයන්ගෙන් කෙරෙන ආයාචනයක්!
ලොව පුරා උග්ර වෙමින් පවතින යුද ගැටුම් හේතුවෙන් අහිංසක සිවිල් වැසියන්, විශේෂයෙන්ම කාන්තාවන් සහ දරුවන් මුහුණ දෙන අතිශය ඛේදජනක ඉරණම පිළිබඳව දැඩි අවධානය යොමු කරමින්, ශ්රී ලංකාවේ හිටපු ළමා හා කාන්තා කටයුතු අමාත්යවරියක මෙන්ම 1985ලෝක රූ රැජින ද වන රෝසි සේනානායක මහත්මිය විසින් විශේෂ මාධ්ය නිවේදනයක් නිකුත් කර තිබේ. ගැටුම් වෙනුවට මනුෂ්යත්වය තෝරා ගන්නා ලෙස ලෝක නායකයන්ගෙන් සහ එක්සත් ජාතීන්ගේ සංවිධානයෙන් වහාම සාමකාමී මැදිහත්වීමක් ඉල්ලා සිටින එම සම්පූර්ණ නිවේදනය පහතින් පළවේ.
ලෝකයේ සාමය, සහජීවනය සහ මනුෂ්යත්වය දැඩි ලෙස තර්ජනයට ලක්ව ඇති, ජාතීන් අතර බෙදීම් උග්ර වෙමින් පවතින යුගයක, සන්සුන්භාවය, සංයමය සහ වගකීම් සහගත නායකත්වයක් වෙනුවෙන් හඬ නැගීම අප සැමගේ අනිවාර්ය සාමූහික වගකීමකි.
පළමු සහ දෙවන ලෝක යුද්ධ මෙන්ම ඉතිහාසය පුරා දිවෙන අමිහිරි යුද අත්දැකීම් අපට කියා දෙන එක් ප්රබල සත්යයක් තිබේ. එනම්, ප්රචණ්ඩත්වයෙන් සහ මිලිටරි ගැටුම්වලින් කිසිදා සැබෑ සාමයක් හෝ ජයග්රහණයක් අත් නොවන බවයි. ඒ වෙනුවට එයින් සිදුවන්නේ සමාජයන් විනාශ වී, අනාගත පරපුරට දරාගත නොහැකි තරම් ගැඹුරු කැළැල් සහ වේදනාවන් ඉතිරි වීම පමණි. සැබෑ සහ තිරසාර සාමයක් ගොඩනැගිය හැක්කේ සංවාදය, රාජ්යතාන්ත්රික මැදිහත්වීම් සහ මානව ගෞරවයට අන්යෝන්ය වශයෙන් ගරු කිරීමෙන් පමණක් බව අතීතයේ කටුක පාඩම් අපට නිරන්තරයෙන් සිහිපත් කරයි.
අවි නොගත් අහිංසකයන්ගේ ඛේදවාචකය
යුද්ධයේ සැබෑ මිල ගෙවන්නේ යුද බිමේ සටන් වදින සෙබළුන් හෝ තීරණ ගන්නා නායකයින් පමණක් නොවේ. යුද්ධයට කිසිදු සෘජු සම්බන්ධයක් නැති, කිසිදිනෙක අවි නොගත් අහිංසක දරුවන් සහ කාන්තාවන් මේ කුරිරු ගැටුම්වල ප්රධානතම වින්දිතයින් බවට පත්වීම අතිශය ඛේදජනකය.
- මවකගේ විලාපයක්, කුසගින්නේ සහ බියෙන් හැඬලන දරුවෙකුගේ කඳුළක් යනු කවර පාර්ශවයක වුවද සමස්ත මනුෂ්යත්වයේම පරාජයකි.
- මේ මොහොතේ පවතින ගැටුම්වලට සම්බන්ධ සියලු පාර්ශ්වයන්ගෙන් මා ඉතා සංවේදීව ඉල්ලා සිටින්නේ, ඉහළම මට්ටමේ සංයමයක් ප්රගුණ කරන ලෙසත්, යුද තත්ත්වය සමනය කිරීම සඳහා වහාම අර්ථවත් පියවර ගන්නා ලෙසත්ය.
- කුමන තත්ත්වයක් යටතේ වුවද සිවිල් වැසියන්ගේ ආරක්ෂාව, විශේෂයෙන්ම කාන්තාවන්ගේ සහ දරුවන්ගේ සුරක්ෂිතභාවය, ගෞරවය සහ යහපැවැත්ම කිසිදු කොන්දේසියකින් තොරව සහතික කළ යුතුම බව මා තරයේ අවධාරණය කරමි.
ජාත්යන්තර ප්රජාවේ සහ එක්සත් ජාතීන්ගේ වගකීම
ජාත්යන්තර මානුෂීය නීතිය සහ සන්නද්ධ ගැටුම් පාලනය කරන විශ්වීය වශයෙන් පිළිගත් නීතිරීති අමු අමුවේ උල්ලංඝනය වන අයුරින් වර්තමාන යුද ගැටුම් නිර්මාණය වෙමින් පැවතීම දැඩි කම්පනයට කරුණකි. මෙම නීතිමය සහ සදාචාරාත්මක බැඳීම් නොසලකා හරින ඕනෑම ක්රියාවක් මනුෂ්යත්වයේ සහ යුක්තියේ මූලධර්මවලට එල්ල කරන බරපතළ තර්ජනයක් වන අතර, එය කිසිදු පැකිලීමකින් තොරව අප හෙළා දැකිය යුතුය.
මෙම තීරණාත්මක මොහොතේ ජාත්යන්තර ප්රජාවට තවදුරටත් නිහඬව බලා සිටිය නොහැක. තවදුරටත් සිදුවන මානව ඛේදවාචකයන් වළක්වා ගැනීමට සහ සාමකාමී විසඳුම් ප්රවර්ධනය කිරීමට පැහැදිලි සදාචාරාත්මක මෙන්ම නීතිමය වගකීමක් ලෝකයට ඇත. ඒ සම්බන්ධයෙන්, අදාළ සියලුම පාර්ශ්වයන් සම්බන්ධ කර ගනිමින් මෙම ගැටුම වහාම සහ ස්ථිරවම අවසන් කිරීම අරමුණු කරගත් හදිසි රාජ්යතාන්ත්රික මැදිහත්වීම් සඳහා එක්සත් ජාතීන්ගේ සංවිධානය (UN) වඩාත් සක්රීය සහ තීරණාත්මක කාර්යභාරයක් ඉටු කළ යුතු යැයි මා ඉතා ගෞරවයෙන් යුතුව ඉල්ලා සිටිමි. ජාත්යන්තර සාමය සහ ආරක්ෂාව සුරැකීමේ ප්රමුඛතම ගෝලීය ආයතනය ලෙස ඔවුන්ගේ වගකීම අන් කවරදාටත් වඩා අද වැදගත් වී ඇත.
සාමය යනු බලහත්කාරයෙන් පැටවිය හැක්කක් නොවේ
සාමය කිසිදා අවි බලයෙන් හෝ බලහත්කාරයෙන් පැනවිය නොහැක. පලිගැනීමේ චක්රයක් තුළින් එය කිසිදා මතු නොවේ. සාමය ගොඩනැගිය යුත්තේ සංවාදය, වගවීම, මානව හිමිකම්වලට ගරු කිරීම සහ යුක්තිය උදෙසා වන අවංක කැපවීමක් මත පමණි.
මානව ඉතිහාසයේ මෙම තීරණාත්මක මොහොතේ, ලොව පුරා සිටින නායකයින් දේශපාලන සහ ජාතිකත්ව බෙදීම්වලින් ඔබ්බට ගොස්, බලයට වඩා මනුෂ්යත්වයත්, ගැටුමට වඩා සාමයත් තෝරා ගැනීමේ ධෛර්යය ප්රදර්ශනය කළ යුතුය. අද ලෝකයට හදිසි අවශ්යතාවක් වී ඇත්තේ ගැටුම වෙනුවට දයාව, රාජ්යතාන්ත්රිකභාවය සහ සහයෝගීතාව තෝරා ගන්නා වගකීම් සහගත නායකත්වයකි.
සාමය, ජාත්යන්තර නීතිය සහ අහිංසක ජීවිත ආරක්ෂා කිරීම වෙනුවෙන් අපගේ සාමූහික කැපවීම යළිත් තහවුරු කරමු. අප ගන්නා සෑම තීරණයකම කේන්ද්රය විය යුත්තේ වෙන කිසිවක් නොව ‘මනුෂ්යත්වයයි’.
රෝසි සේනානායක
හිටපු ළමා සහ කාන්තා කටයුතු අමාත්ය / ලෝක රූ රැජින (1985),
ශ්රී ලංකාව.