අපරාධ පරීක්ෂණ දෙපාර්තමේන්තු අත්අඩංගුවේ පසුවන හිටපු බුද්ධි ප්රධානියාගේ මූලික අයිතිවාසිකම් දැඩි ලෙස උල්ලංඝනය වෙයි
හිටපු රාජ්ය බුද්ධි අංශ (SIS) ප්රධානී සුරේෂ් සලේ අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන මේ වන විට දින ගණනාවක් ගත වී ඇති අතර, අත්අඩංගුවේ පසුවන කාලය තුළ ඔහුට දැඩි අමානුෂික සහ කෲර මානසික වද හිංසා පමුණුවමින් සිටින බවට බරපතළ කරුණු මේ වන විට අනාවරණය වී තිබේ. ශ්රී ලංකා ආණ්ඩුක්රම ව්යවස්ථාවෙන් සහ ජාත්යන්තර මානව හිමිකම් ප්රඥප්තීන් මගින් සහතික කර ඇති අයිතිවාසිකම් රැසක් මෙහිදී ප්රසිද්ධියේම උල්ලංඝනය වී ඇති බව නීති විශේෂඥයෝ පෙන්වා දෙති.
මෙම අමානුෂික සැලකීම් පිළිබඳ තොරතුරු අනාවරණය වූයේ අද (07) දින සුරේෂ් සලේ මහතාව බැලීම සඳහා ඔහුගේ සොහොයුරා වන, යුද බිමේදී ආබාධිත තත්ත්වයට පත්ව විශ්රාම ගත් හිටපු කමාන්ඩෝ මේජර් සෙල්වින් සලේ CIDය වෙත ගිය අවස්ථාවේදීය.
1. මූලික සෞඛ්ය පහසුකම් ප්රතික්ෂේප කිරීම සහ ජීවිත අවදානම
සෙල්වින් සලේ මහතා අනාවරණය කරන පරිදි, හිටපු බුද්ධි ප්රධානියා රඳවා සිටින කුටිය මීයන්ගෙන් සහ කැරපොත්තන්ගෙන් ගහණ වූ අපිරිසිදු ස්ථානයකි.
- නින්ද අහිමි කිරීම සහ රෝගී තත්ත්වය: මීයන්ගේ ගැවසීම හේතුවෙන් ඔහුට නිසි නින්දක් ලබා ගැනීමට නොහැකි වී ඇත. දැනටමත් මිග්රේන් (Migraine) රෝගී තත්ත්වය සඳහා දිනපතා ඖෂධ ලබාගන්නා ඔහු, මෙම තත්ත්වය හමුවේ දැඩි මානසික හා ශාරීරික පීඩනයකට ලක්ව සිටියි.
- මී උණ (Leptospirosis) අවදානම: “මෙතන හිටියොත් මට මී උණ හැදෙනවා, මුං හදන්නෙ මට මී උණ හදවලා මරන්න” යැයි සලේ මහතා සිය සොහොයුරා සමග හඬනගා පවසා තිබේ.
- ආහාර ප්රතික්ෂේප කිරීම: ඔහුගේ අසනීප තත්ත්වයන් සැලකිල්ලට ගෙන නිවසින් ආහාර ලබා දීමට බිරිඳ විසින් කළ ඉල්ලීම ද බලධාරීන් ප්රතික්ෂේප කර ඇත. ඔහුට සුදුසු ආහාර නොලැබීම හේතුවෙන් නුදුරේදීම ඔහුට ආහාර වර්ජනයකට යාමට සිදුවනු ඇති බවට පවුලේ ඥාතීන් බිය පළ කරයි.
ශ්රී ලංකා ආණ්ඩුක්රම ව්යවස්ථාවේ 11 වන වගන්තියට අනුව “කිසිම තැනැත්තෙකු කෲර, අමානුෂික හෝ අවමන් සහගත සැලකිල්ලකට භාජනය නොකළ යුතුය.” සැකකරුවෙකුගේ සෞඛ්යය හා ආරක්ෂාව තහවුරු කිරීම අත්අඩංගුවට ගත් ආයතනයේ පූර්ණ වගකීමකි.
කෙසේ වුවත් PTI පනත හරහා අතුඅඩංගුවට පත් අයෙක්ව නිරීක්ෂණය කිරීමට අධිකරණයේ විනිසුරුවරයාට, මානව හිමිකම් සංවිධානයට යාමට අවසරයක් තිබෙන නමුත් මේ දක්වා ඔවුන් පැමිණ නැති බව අනාවරණය වේ.
2. පවුලේ සාමාජිකයින්ට පනවා ඇති අසාධාරණ සීමා
සලේ මහතාව බැලීමට පැමිණෙන ඕනෑම අයෙකුට ‘පොලිස් වාර්තාවක්’ (Police Clearance Report) අනිවාර්ය කරමින් CIDය විසින් පෙර නොවූ විරූ නීතියක් ක්රියාත්මක කර තිබේ.
- සිය පියා බැලීම සඳහා 21 හැවිරිදි පුත්රයා දින 7කට පෙර පොලිස් වාර්තාවක් ඉල්ලා අයදුම් කර ඇතත් මේ දක්වා එය නිකුත් කර නැත.
- එම වාර්තාව නොමැතිව අද (07) දින පියා බැලීමට ගිය පුත්රයාව පැය තුනක් පුරා රස්තියාදු කර, අවසානයේදී පියා දැකීමේ අවස්ථාව ලබා නොදී හරවා යවා තිබේ.
- කෙසේ වෙතත්, සෙල්වින් සලේ මහතාට සිය සොහොයුරා බැලීමට අවස්ථාව ලැබී ඇත්තේ ඔහු හිටපු කමාන්ඩෝ නිලධාරියෙකු වීමත්, මාස 6කට පෙර ගත් පොලිස් වාර්තාවක් ඔහු සතුව තිබීමත් නිසාය.
3. නීතිඥ – සේවාදායක රහස්යභාවය උල්ලංඝනය කිරීම
මෙම සිද්ධියේ වඩාත් බරපතළම නෛතික උල්ලංඝනය වන්නේ නීතිඥවරුන්ට සිය සේවාදායකයා හමුවීමට දමා ඇති බාධාවන් ය.
- නීතිඥවරුන්ට සලේ මහතා හමුවීමට සිදුව ඇත්තේ CID නිලධාරීන්ගේ සෘජු අධීක්ෂණය යටතේය.
- නීතිඥවරයා සහ සේවාදායකයා අතර සිදුවන සංවාදයන් පවා පොලිසිය විසින් සටහන් කරගන්නා බව වාර්තා වේ.
ශ්රී ලංකා සාක්ෂි ආඥා පනතේ 126 වන වගන්තිය යටතේ නීතිඥයෙකු සහ සේවාදායකයෙකු අතර සිදුවන සන්නිවේදනය පූර්ණ රහස්ය (Privileged Communication) එකකි. පොලිසිය එයට සවන් දීම හෝ සටහන් කර ගැනීම ආණ්ඩුක්රම ව්යවස්ථාවේ 13(3) වගන්තියෙන් තහවුරු කර ඇති ‘සාධාරණ නඩු විභාගයක් සඳහා ඇති අයිතිය’ මෙන්ම නීතිඥ වෘත්තියේ ගෞරවයට කරන දැඩි නිග්රහයකි.
4. දේශපාලන අතපෙවීම් සහ පාර්ලිමේන්තු හෙළිදරව්ව
මෙම විමර්ශනවල අපක්ෂපාතීත්වය පිළිබඳව බරපතළ ප්රශ්න මතුවී ඇත්තේ මීට එල්ල වන දේශපාලන බලපෑම් හේතුවෙනි. ඊයේ (06) පාර්ලිමේන්තුවේදී පාර්ලිමේන්තු මන්ත්රී දයාසිරි ජයසේකර මන්ත්රීවරයා විසින් දිවුරුම් පෙත්සමක් සභාවට ඉදිරිපත් කරමින් මේ පිළිබඳව ආණ්ඩුවෙන් දැඩිව ප්රශ්න කළේය.
- හිටපු ජ්යෙෂ්ඨ පොලිස් නිලධාරී ශානි අබේසේකර මහතා කිසිදු දේශපාලන ක්රියාවලියකට සම්බන්ධ නැතැයි ආණ්ඩුව මීට පෙර කළ ප්රකාශය ජයසේකර මහතා මෙහිදී අභියෝගයට ලක් කළේය.
- මන්ත්රීවරයාගේ ප්රකාශය: “මේ දිවුරුම් පෙත්සමේ එතුමාම පිළිගන්නවා, ඒගොල්ලෝ ජාතික ජන බලවේගයේ (NPP) දේශපාලන පක්ෂයේ විශ්රාමික එකමුතුවේ වැඩ කරනවා කියලා. ඔහුවම පිළිගන්නවා ඔහු දේශපාලනය කරනවා කියලා. එහෙනම් කොහොමද මේ දේශපාලන පක්ෂෙකට සම්බන්ධ අය මේ විමර්ශන කරන්නේ?”
ජාතික ජන බලවේගයේ විශ්රාමික එකමුතුවේ සක්රීය දේශපාලනයේ නිරත වන පුද්ගලයින් සෘජුවම මෙම විමර්ශනවලට සම්බන්ධ වී සිටීම හරහා, මෙම අත්අඩංගුවට ගැනීම සහ කෲර සැලකීම් දේශපාලන පළිගැනීමක් ද යන දැඩි සැකය සමාජය තුළ නිර්මාණය වී තිබේ.
“ද ලීඩර්” උපුටාගැනීමකි.