කිලිනොච්චිය, පලෙයි රක්ෂිතයේ එල්.ටී.ටී.ඊ (LTTE) සංවිධානයට අයත් කඳවුරක් සහ බෝම්බ නිෂ්පාදනාගාරයක් ඇති බවට අසත්ය ප්රචාරයක් සිදුකිරීමේ සිද්ධියට අදාළව අත්අඩංගුවට ගත් සැකකරු ලබන 2 වනදා දක්වා රක්ෂිත බන්ධනාගාරගත කිරීමට කොළඹ කොටුව මහේස්ත්රාත් පසන් අමරසේන මහතා අද (19) නියෝග කළේය.
මෙලෙස රක්ෂිත බන්ධනාගාරගත කෙරුණේ අන්තර් මහාද්වීපික මානව හිමිකම් සංවිධානයේ විධායක අධ්යක්ෂ ලෙස පෙනී සිටි සංගීත් ජයසේකර නමැත්තෙකි.
සිද්ධියේ පසුබිම සහ අධිකරණයේදී අනාවරණය වූ කරුණු:
- අසත්ය මාධ්ය හමුව: සැකකරු විසින් ඉකුත් අගෝස්තු 14 වනදා කොළඹ හෝටලයක මාධ්ය හමුවක් පවත්වමින් මෙන්ම යූටියුබ් නාලිකා ඔස්සේද පලෙයි රක්ෂිතයේ LTTE කඳවුරක් ඇති බවට ප්රකාශ කර තිබුණි. මෙම ප්රකාශය පොලිස්පතිවරයා විසින් පසුව සම්පූර්ණයෙන්ම ප්රතික්ෂේප කර ඇත.
- සැබෑ තත්ත්වය: අදාළ රක්ෂිතයේ ද්රවිඩ ජාතික ව්යාපාරිකයෙකු විසින් නීති විරෝධී ලෙස ගොවිපොළක් සහ ඇඟලුම් කම්හලක් ඉදිකිරීමේ සිද්ධියක් සම්බන්ධයෙන් පලෙයි පොලිසිය මගින් අධිකරණය හමුවේ නඩු පවරා ඇති බව විමර්ශන නිලධාරීන් පැවසීය.
- ව්යාජ හැඳුනුම්පත්: සැකකරු ව්යාජ හැඳුනුම්පත් කිහිපයක් භාවිතා කර ඇති අතර, කිලිනොච්චිය ප්රදේශයේ අඩවි වන නිලධාරියෙකු දුන් තොරතුරක් මත මෙම ප්රකාශය කළ බවට සැකකරු පවසා ඇත.
- නීතිමය පියවර: මහජන කැලඹීමක් ඇති කිරීම සහ සාමයට බාධා කිරීම යන කරුණු මුල්කරගනිමින් දණ්ඩ නීති සංග්රහයේ 120 සහ 485 වගන්ති ප්රකාරව සැකකරු අත්අඩංගුවට ගෙන තිබේ.
ජාතික ආරක්ෂාවට බලපෑමක් – මහේස්ත්රාත්ගෙන් දැඩි අවධානය:
මෙම ප්රකාශය ජාතික ආරක්ෂාවට බරපතල තර්ජනයක් විය හැකි බැවින්, ජාතික ආරක්ෂාවට බලපෑම් කිරීමේ චෝදනාව යටතේ නීතිය ක්රියාත්මක නොකළේ මන්දැයි මහේස්ත්රාත්වරයා මෙහිදී ප්රශ්න කළේය. ඊට පිළිතුරු දෙමින් ත්රස්ත විමර්ශන කොට්ඨාශය සඳහන් කළේ ඒ සම්බන්ධයෙන්ද ඉදිරියේදී චෝදනා ගොනු කිරීමට කටයුතු කරන බවයි.
තවද, සිද්ධියට අදාළව සංස්කරණය නොකළ වීඩියෝ දර්ශන ත්රස්ත විමර්ශන ඒකකයට ලබාදෙන ලෙස මාධ්ය ආයතන 8කට නියෝග කළ මහේස්ත්රාත්වරයා, සිද්ධිය සම්බන්ධයෙන් වන විමර්ශන ප්රගති වාර්තාවක් ඊළඟ නඩු වාරයේදී ඉදිරිපත් කරන ලෙසද පොලිසියට නියෝග කළේය.