මහරගම අපේක්ෂා රෝහලේ පිළිකා රෝගීන්ගේ විකිරණ ප්‍රතිකාර සඳහා අත්‍යවශ්‍ය නව සීටී සිමියුලේටර් (CT Simulator) යන්ත්‍රයේ මෘදුකාංග නොගැළපීමක් හේතුවෙන් රෝගීන් 1500කට ආසන්න පිරිසක් ප්‍රතිකාර ලබාගත නොහැකිව බරපතළ අවදානමකට ලක්ව ඇති බව රජයේ විකිරණ විද්‍යා තාක්ෂණවේදීන්ගේ සංගමය අනාවරණය කරයි.
රෝහලේ තිබූ පැරණි සීටී සිමියුලේටර් යන්ත්‍රය ඉවත් කර මාස හතරකට අධික ප්‍රමාදයකින් පසු පසුගිය සැප්තැම්බර් 07 වනදා නව යන්ත්‍රය ස්ථාපනය කර තිබුණද, එහි පවතින තාක්ෂණික දෝෂ හේතුවෙන් ප්‍රතිකාර සැලසුම් කිරීමේ ක්‍රියාවලිය (Treatment Planning) සම්පූර්ණයෙන්ම ඇනහිට තිබේ.
ප්‍රතිකාර ඇනහිටීමට හේතුව
පිළිකා රෝගියෙකුට විකිරණ ප්‍රතිකාරයක් ආරම්භ කිරීමට ප්‍රථමයෙන් සීටී සිමියුලේෂන් පරීක්ෂණයක් සිදු කර විකිරණ මාත්‍රාව හා ඉලක්කය සැලසුම් කිරීම (Planning) අනිවාර්ය වේ.
නමුත් ස්ථාපනය කරන ලද නව යන්ත්‍රයේ මෘදුකාංගය, රෝහලේ පවතින විකිරණ ප්‍රතිකාර සැලසුම් කිරීමේ මෘදුකාංගය (Treatment Planning System) සමඟ නොගැළපීම හේතුවෙන් එම පරීක්ෂණ ප්‍රතිඵල ප්‍රතිකාර සඳහා යොදා ගැනීමට නොහැකි වී ඇත.
පෙට් ස්කෑනරයත් අසාර්ථකයි: පියයුරු පිළිකා රෝගීන් දැඩි අර්බුදයක
මීට තාවකාලික විකල්පයක් ලෙස පෙට් ස්කෑන් (PET Scanner) යන්ත්‍රය යොදා ගැනීමට උත්සාහ කළද, සාමාන්‍ය සීටී සිමියුලේටර් යන්ත්‍රයක ඇති ධාරිතාව හෝ අදාළ අමතර උපාංග (Accessories) පෙට් ස්කෑන් යන්ත්‍රයේ නොමැති වීම නිසා එය සාර්ථක වී නොමැත.
විශේෂයෙන්ම පියයුරු පිළිකා රෝගීන්ට අවශ්‍ය සීටී සිමියුලේෂන් පරීක්ෂණ පෙට් යන්ත්‍රය මඟින් සිදු කිරීමට කිසිසේත්ම නොහැකි වීම හේතුවෙන් ඔවුන් දැඩි අසරණභාවයකට පත්ව සිටී.
රෝගී ජීවිත අවදානමේ: පුද්ගලික රෝහල්වලට ජයපැන්
මෙම අර්බුදය හමුවේ නිර්මාණය වී ඇති බරපතළ තත්ත්වය:
- 1500ක පොරොත්තු ලේඛනයක්: පරීක්ෂණ ප්‍රමාද වීමෙන් රෝගීන්ගේ පිළිකා සෛල ශරීරය පුරා පැතිරීමේ දැඩි අවදානමක් මතුව ඇත.
- ප්‍රතිකාර ධාරිතාව 33%කින් පහතට: රෝහලේ සක්‍රීය ලීනියර් ඇක්සලරේටර් යන්ත්‍ර 4 මඟින් මීට පෙර දිනකට රෝගීන් 300කට ප්‍රතිකාර කළද, මේ වන විට එය 200 දක්වා පහත වැටී තිබේ.
- කෝටි ගණනක මහජන මුදල් අපතේ: රුපියල් කෝටි 60–80 අතර වටිනාකමකින් යුත් මෙවැනි යන්ත්‍රවල වගකීම් කාලය (Warranty Period) තුළ උපරිම ඵලදායිතාව ලබා නොගැනීමෙන් රජයට විශාල පාඩුවක් සිදු වේ.
- පුද්ගලික අංශයේ ගසාකෑම: රජයේ රෝහලෙන් ප්‍රතිකාර ප්‍රමාද වන විට පෞද්ගලික අංශයෙන් විකිරණ ප්‍රතිකාර ලබා ගැනීමට රෝගියෙකුට රුපියල් ලක්ෂ 5 සිට ලක්ෂ 20 දක්වා මුදලක් වැය කිරීමට සිදු වේ. මේ හේතුවෙන් පුද්ගලික රෝහල්වලද මේ වන විට පෝලිම් නිර්මාණය වී ඇති අතර, ඔවුන් අධික ලාභ ලබමින් සිටී.
සෞඛ්‍ය අමාත්‍යාංශයේ බලධාරීන් මේ පිළිබඳව මෙතෙක් කඩිනම් අවධානයක් යොමු කර නොමැති අතර, මෙම තාක්ෂණික ගැටලුව කඩිනමින් නිරාකරණය කර අහිංසක පිළිකා රෝගීන්ගේ ජීවිත බේරා ගැනීමට මැදිහත් වන ලෙස රජයේ විකිරණ විද්‍යා තාක්ෂණවේදීන්ගේ සංගමයේ සභාපති චානක ධර්මවික්‍රම මහතා බලධාරීන්ගෙන් ඉල්ලා සිටියි.