විශේෂ වාර්තාව — HariDeshayaLk
වැලිගම ගල්බොක්ක ඓතිහාසික බුහාරි පල්ලිය සහ බාරි මදුරසාවේ පරිපාලනය බලහත්කාරයෙන් අත්පත් කරගැනීමේ අරමුණින් වඛ්ෆ් සභාව සහ මුස්ලිම් ආගමික හා සංස්කෘතික කටයුතු දෙපාර්තමේන්තුව එක්ව ක්‍රියාත්මක කළ අත්තනෝමතික මෙහෙයුම සහ පෙත්සම්කරුගේ “අල්ලස් දුන්නා” යන ආන්දෝලනාත්මක හඬපටය රට හමුවේ අනාවරණය කිරීමත් සමඟ, මුස්ලිම් ආගමික හා සංස්කෘතික කටයුතු දෙපාර්තමේන්තුවේ අධ්‍යක්ෂ මොහොමඩ් නවාස් දැඩි කලබලයකට පත්ව ඇත.
කිසියම් මාධ්‍ය අනාවරණයකට අදාළව ශිෂ්ටසම්පන්නව සහ නීත්‍යානුකූලව කරුණු පැහැදිලි කිරීමට පිළිතුරු දීමේ පූර්ණ අයිතියක් (Right of Reply) පවතිද්දී, එම ප්‍රජාතන්ත්‍රවාදී පිළිවෙත මුළුමනින්ම නොසලකා හරිමින් මොහොමඩ් නවාස් විසින් කිසිදු විධිමත් ලිඛිත පිළිතුරක් හෝ කරුණු දැක්වීමක් ලබාදීම ප්‍රතික්ෂේප කර තිබේ. ඒ වෙනුවට ඔහු HariDeshayaLk ප්‍රධාන කතුවරයා අමතමින් සිදුකර ඇත්තේ අතිශය ප්‍රචණ්ඩකාරී, ආක්‍රමණශීලී සහ අශික්ෂිත දුරකථන ඇමතුමකි.
ලිඛිත පිළිතුරක් වෙනුවට අධ්‍යක්ෂ නවාස්ගේ ප්‍රචණ්ඩකාරී දුරකථන ඇමතුම
රාජ්‍ය දෙපාර්තමේන්තුවක ඉහළම විධායක නිලධාරියෙකු වන මොහොමඩ් නවාස්, මාධ්‍ය ආයතනයක් මතු කළ බරපතළ කරුණුවලට විධිමත් ලිඛිත පිළිතුරක් සපයනවා වෙනුවට දුරකථනය ඔස්සේ ප්‍රචණ්ඩකාරී ස්වරූපයෙන් කඩාපැනීමෙන් පැහැදිලි වන කරුණු කිහිපයකි:
- Right of Reply මුළුමනින්ම උල්ලංඝනය කිරීම: තමන්ගේ පාර්ශ්වයේ නිර්දෝෂීභාවය ඔප්පු කිරීමට හෝ කරුණු පැහැදිලි කිරීමට නීත්‍යානුකූලව ලිඛිත ප්‍රතිචාරයක් දැක්වීමට සම්පූර්ණ ඉඩකඩ තිබියදී, හුදු දුරකථන තර්ජන මඟින් මාධ්‍ය නිහඬ කිරීමට තැත් කිරීම.
- අල්ලස් චෝදනා හමුවේ නිරුත්තර වීම: නඩුවේ ප්‍රධාන පෙත්සම්කරුවෙකු විසින් “දෙන්න ඕන තැන්වලට අල්ලස් පවා දුන්නා” යැයි ප්‍රසිද්ධියේ පාපොච්චාරණය කරද්දී සහ එක රැයකින් රහසිගතව සිදුකළ පත්වීම් ලිපි අත්සන් කිරීම් හෙළිදරව් වෙද්දී, ඊට තාර්කික හෝ නීතිමය පිළිතුරක් ලබාදීමට ඔහු සතුව කිසිදු සාක්ෂියක් නොමැති වීම.
- රාජ්‍ය සේවා ආචාරධර්ම බිඳ දැමීම: සාමාන්‍ය පුරවැසියෙකුට හෝ මාධ්‍යවේදියෙකුට තබා කිසිවෙකුට එරෙහිව මෙලෙස ආක්‍රමණශීලී ලෙස හැසිරීමට රාජ්‍ය නිලධාරියෙකුට කිසිදු නීතිමය හෝ සදාචාරාත්මක අයිතියක් නොතිබීම.
අල්ලස් හඬපටය රටම කළඹද්දී අමාත්‍ය සුනිල් සෙනෙවිගේ අභිරහස් නිහඬියාව
අධ්‍යක්ෂ මොහොමඩ් නවාස්ගේ මෙම ප්‍රචණ්ඩකාරී හැසිරීමටත් වඩා බරපතළ ප්‍රශ්නය වන්නේ, තමන් යටතේ පවතින දෙපාර්තමේන්තුව තුළ සිදුවන මෙම අක්‍‍රමිකතා සහ අල්ලස් චෝදනා හමුවේ විෂයභාර බුද්ධශාසන, ආගමික හා සංස්කෘතික කටයුතු අමාත්‍ය සුනිල් සෙනෙවි මහතා දිගින් දිගටම අනුගමනය කරන අභිරහස් නිහඬ ප්‍රතිපත්තියයි:
- හඬපට හෙළිදරව්වට කිසිදු පරීක්ෂණයක් නැත්තේ ඇයි? නඩුවේ පෙත්සම්කරු විසින්ම අල්ලස් ලබාදුන් බවට සාක්ෂි සහිත හඬපටයක් ප්‍රසිද්ධ වී තිබියදීත්, ඒ පිළිබඳව අමාත්‍යාංශ මට්ටමේ ස්වාධීන පරීක්ෂණයක් කැඳවීමට හෝ අල්ලස් හෝ දූෂණ චෝදනා විමර්ශන කොමිෂන් සභාව (CIABOC) වෙත පැමිණිලි කිරීමට අමාත්‍යවරයා පියවර නොගන්නේ මන්ද?
- අධ්‍යක්ෂවරයාගේ ප්‍රචණ්ඩකාරී හැසිරීම අනුමත කරන්නේද? රාජ්‍ය දෙපාර්තමේන්තු ප්‍රධානියෙකු මාධ්‍යයකට නිල පිළිතුරක් දීම මඟහැර ප්‍රචණ්ඩකාරී දුරකථන ඇමතුම් මඟින් බියවැද්දීමට කටයුතු කරද්දී, අමාත්‍ය සුනිල් සෙනෙවි මහතා ඔහුට එරෙහිව විනය පියවරක් නොගෙන නිහඬව සිටින්නේ කාගේ වුවමනාවටද?
- ශ්‍රේෂ්ඨාධිකරණ ක්‍රියාවලියට පයින් ගැසීම: ශ්‍රේෂ්ඨාධිකරණය හමුවේ නඩුවක් පවතිද්දී, අධිකරණය නොමඟ යවමින් රාත්‍රී කාලයේ සිදුකළ බව කියන අත්තනෝමතික පත්වීම් අවලංගු කිරීමට අමාත්‍යවරයා මැදිහත් නොවන්නේ මන්ද?
HariDeshayaLk ස්ථාවරය
අධ්‍යක්ෂ මොහොමඩ් නවාස්ගේ ප්‍රචණ්ඩකාරී දුරකථන ඇමතුම් හමුවේ හෝ අමාත්‍ය සුනිල් සෙනෙවි මහතාගේ නොසැලකිලිමත් නිහඬතාව හමුවේ වැලිගම බුහාරි පල්ලියේ අයිතිය සහ දූෂණ විරෝධී හෙළිදරව්ව කිසිසේත් යටපත් කළ නොහැක.
රාජ්‍ය බලය අතැතිව සිටියද, පිළිතුරු දීමේ අයිතිය මඟහරිමින් මාධ්‍යවේදීන්ට ප්‍රචණ්ඩකාරී ලෙස තර්ජනය කිරීමට කිසිදු නිලධාරියෙකුට ඉඩක් නොමැති අතර, මෙම සිදුවීම සම්බන්ධයෙන් අදාළ සියලු වගකිවයුතු ආයතන හමුවේ නීතිමය පියවර ගැනීමට අප සූදානම්ය.